الأجازة تاني أهم بيفكر فيها أي موظف بعد مج النسكافيه، اللي بيشربه الصبح علشان يظبط دماغه. أهي يوم كده بيظبط مود الأسبوع ويخليك راجع الشغل فريش. لكن الورطة بقى لما تيجي أجازة زي المولد النبوي، وكل موظفين الدولة يأجزوا. ماعدا شركتك العاقة علشان قطاع خاص. ساعتها بقى لازم تلجأ للطرق الملتوية، علشان تستمتع بأجازة رايقة. تعالى نقولك على 4 أفكار تضرب بيهم أجازتك:

- ظبط علشان تتظبط

خليك دوغري، اللي يقدم السبت يلاقي الحد. يعني شوف شغلك المتأخر وانجزه، حتى لو هتقعد بعد مواعيد الشغل. ساعتها مديرك هيقدر مجهودك ويديك الأجازة التمام.

- التوقيت المناسب

أهم حاجة إنك تختار الوقت المناسب علشان تبلغ مديرك بالإجاز. يعني وقت ما مزاجه يكون رايق، وشارب فنجان القهوة بتاعه. لو لقيته قافش أو متضايق، بلاش أحسنلك.

- حطه قدام الأمر الواقع

مناسبة زي المولد النبوي بتكون معروفة من بدري، يعني ممكن ترتب أمورك على أجازة من بدري. بلغ مديرك إنك ظبطت سفرية مع صحابك في اليوم ده، ومينفعش تلغيها علشان حجزت ودفعت خلاص. غير كده الفلوس هتروح عليك. 

- تعبان ياهمام

ده بقى آخر كارت، عرَف مديرك الصبح برسالة إنك مش جي. أصلك تقلت في أكل حلاوة المولد إمبارح، وبطنك نازلة فيك تقطيع. وطبعًا أوعده إن ده مش هيتكرر.

وأجازة سعيدة