بعد انفجار بيروت اللي هز العالم كله، انتشرت مقاطع فيديو مختلفة لأكتر من مكان خلال الانفجار. من ضمنها كان مقطع مؤثر لعروسة في مراسم الزفاف، خلال جلسة تصوير في منطقة الصيفي وسط بيروت، القريبة من الانفجار. واللي اتحول في لحظة لمشهد مرعب يخطف القلوب.
وحسب ما نشر "سكاي نيوز عربية"، العروسة اللي ظهرت في الفيديو هي "إسراء السبلاني"، دكتورة عايشة في الولايات المتحدة. وجت لبيروت قبل 3 أسابيع علشان فرحها. وعن التجربة اللي مرت بيها، قالت إنها بدأت تحضيرات الفرح قبل ميعاده بأسبوعين. وكل الأمور كانت ماشية تمام بكل التفاصيل. لحد ما بدأت جلسة التصوير وفجأة حصل الانفجار.
وقالت "السبلاني": "فجأة حصل الانفجار ومفيش كلمة ممكن توصف الموقف. أنا اتصدمت وكنت بسأل نفسي إيه اللي حصل؟ هو أنا هموت؟". وأضاف جوزها إنهم بدأوا يمشوا في المكان وهم مصدومين. والأمر كان محزن بشكل كبير. كان صعب جدًا يوصفوا حجم وقوة الانفجار اللي حصل.
اقترح زوج "إسراء" إنهم لازم يكملوا الاحتفال، وبالفعل كملوا مراسم الزواج لكن وهم في حالة صدمة. وقالت "إسراء": "كملنا الفرح وكنت بضحك لكن من جوايا مصدومة من اللي حصل".
الزوجين ماكنش عندهم أدنى فكرة إن فرحهم يتحول لمأساة، ويمروا بصدمة زي دي. واللي خلت فيديو جلسة تصوير الفرح ينتشر بشكل كبير على الإنترنت.
من قلوبنا سلام لبيروت
