في الوقت اللي بدأ العالم يرجع لطبيعته، بعد معاناة فيروس كورونا. ظهر في الصين مرض جديد اتعرف باسم "الطاعون الدبلي". وزادت الأقاويل إنه هيكون وباء أخطر من كورونا، وهيكون بنفس انتشاره. فهل الكلام ده صحيح؟

نشر الدكتور هاني الناظر - استشاري الأمراض الجلدية، ورئيس المركز القومي للبحوث السابق - بوست من خلال حسابه على فيسبوك، بيطمن فيه المواطنين بعدم انتشار المرض، اللي ظهر مؤخرًا في منطقة منغوليا بالصين. ودعم كلامه بالأسباب دي:

1- لحد دلوقتي مريض صيني واحد اللي تم الاشتباه في إصابته. وتم عزله وبيتعالج في أحد المستشفيات في الصين.

2- المرض بينتج عن إصابة بكتيرية وليست فيروسية، وبالتالي بيتعالج بالمضادات الحيوية زي فيبراميسين أو سيبرو. وبيتم الشفاء منه خلال فترة من 10 لـ 14 يوم، طالما تم تشخيصه مبكرًا.

3- مفيش خوف من انتشاره بشكل مرعب زي ما حصل في القرون الماضية، لإن وقتها ماكنش موجود مضادات حيوية تقضي على البكتريا المسببة للمرض. لكن دلوقتي فالمضادات الحيوية كفيلة بالقضاء عليه في بدايته.

ومن جانب تاني، أكدت منظمة الصحة العالمية إن مرض "الطاعون الدبلي"، مش بيشكل أي خطر في الفترة الحالية. وإنها مستمرة في مراقبة الوضع باستمرار.