بعد انتشار أخبار عن ظهور فيروس جديد في الصين اسمه "هانتا"، وبيمثل نفس خطورة "كورونا"، حصلت موجة من القلق بين رواد مواقع التواصل الاجتماعي. وزاد القلق من احتمال وصوله لينا هنا في مصر. لكن إيه مدى صحة الكلام ده؟

حسب ما نشر "الأهرام"، صرح "جياو جينشيان" المتحدث باسم السفارة الصينية في القاهرة، بإن كل ما يتم تداوله على السوشيال ميديا من أخبار، مالهاش أي أساس من الصحة. وطبقًا لمنظمة الصحة العالمية، العلماء اكتشفوا الفيروس في أوائل السبعينات. كمان الفيروس بينتقل من مخالطة القوارض، وظهر في مناطق كتير حول العالم في السنين اللي فاتت، والعلاج بتاعه موجود بالفعل.

وأكد "جينشيان" على ضرورة مراجعة المصادر الموثقة للأخبار والمعلومات، والإصدارات العلمية لمنظمة الصحة العالمية. خاصة إننا في وقت صعب بتمر بيه كل دول العالم بسبب فيروس كورونا. والنوع ده من الأخبار بيزود الخوف عند الناس.