النهاردة اليوم العالمي لـ "لغة الإشارة"، والعالم كله بيحتفل بها بهدف توصيلها لأكبر عدد من الناس. ودي تاني سنة للاحتفال اليوم ده، بعد موافقة الأمم المتحدة.

فكرة الاحتفال بالأساس جت بعد ما الاتحاد العالمي للصم (بيتكون من 135 جمعية وطنية للصم، بتمثل 72 مليون أصم)، قدم اقتراح للاحتفال باليوم العالمي للغة الإشارة للأمم المتحدة. وبالفعل تم اعتماده في 19 ديسمبر 2017. وبعد كده تم اختيار 23 سبتمبر يوم عالمي، علشان يوافق تاريخ انشاء الاتحاد العالمي عام 1951.

حوالي 80% من اللي بيعانوا من الصمم في العالم بيعيشوا في البلاد النامية. وكمان بيستخدموا لغات إشارة مختلفة. يعني كل دولة لها لغة الإشارة الخاصة بيها، حسب ثقافتها وعادات شعوبها. وفي 300 لغة إشارة حول العالم، مش لغة واحدة زي ما الناس متخيلة.