عيد الأضحى لمة وأكل وسينمات وخروجات وحاجات كتير. وإحنا في كلام القاهرة هنرشح لك 6 حدائق، تقدر تستمتع فيهم بنسيم القاهرة وريحة الخضرة والهواء الطلق. بعيدًا عن الزحمة في أماكن تانية:
حديقة الأزهر
من أكبر الحدائق وأفضلها، وموجودة في القاهرة التاريخية بعد الغورية ومسجد الحسين ومسجد الأزهر. فيها مطاعم وكافيتيريات وقعدات مميزة. وتقدر تقعد وسط الخضرة والمياه. سعر التذكرة 10 جنيه، ومتاحة من 9 الصبح لحد 10 بالليل.
حديقة الأسرة
اسم على مسمى، لأنها للكبار والصغار. فيها ألعاب مختلفة بأسعار تبدأ من 15 جنيه. وكمان نافورة راقصة ومطاعم وكافيهات. يعني تقدر تقضي يوم كامل فيها، من غير ما تخرج منها لأي حاجة. موجودة في مدخل الرحاب 2 – الكيلو 26 - طريق السويس. وسعر التذكرة 50 جنيه.
حديقة الأورمان
فيها أشجار نادرة ومدينة ألعاب للأطفال وكافتيريا كبيرة. واحدة من أروع المناطق، ومكانها مميز في شارع الدقي أمام جامعة القاهرة. وسعر التذكرة 3 جنيه للفرد.
الحديقة اليابانية
هي على الطراز الأسيوي، ومساحتها 10 أفدنة. فيها بحيرات وتماثيل وأشجار مميزة، ومنطقة ملاهي فيها بحيرة تجديف للاطفال. مكانها في شرق حلوان، شارع محمد مصطفى المراغي. وسعر التذكرة 10 جنيه.
الحديقة الدولية
كل جزء جواها بيعبر عن دولة مختلفة، علشان كده تم تسميتها بالحديقة الدولية. جواها مطاعم وكافيهات وملاهي وأماكن عامة للجلوس. موجودة في مدينة نصر. وتعتبر من أشهر الحدائق المصرية. سعر التذكرة في الأعياد 40 جنيه.
حديقة الميريلاند
دي بقى الروقان والرقي كله. أشجار قديمة جدًا، عتيقة وضخمة. تماثيل أثرية ونافورة راقصة وشلالات وملاهي وسينمات وموقف سيارات. وموجودة في شارع الحجاز مصر الجديدة. وسعر التذكرة 20 جنيه.
