لو انت من الناس اللي مالهاش تجارب كتيرة مع المترو، وقريب هيبقالك، اعمل حسابك إن المترو ده معركة لازم تتطلع منها منتصر. علشان لو المترو كسر عزيمتك، مفيش حاجة هتقدر ترجعها تاني. وبخصوص الموضوع ده إليك عزيزي القاريء أهم النصائح الخاصة بركوب مترو الأنفاق:
1- ابعد عن أوقات الذروة
أوقات الذروة في المترو هي طول اليوم. ماعدا من 6 لـ 7 الصبح، ومن 11 لـ 12 بالليل. غير كده بتبقى معجنة يا معلم.
2- انزل من البيت بدري سيكة
في المواصلات بتنزل بدري علشان زحمة الطريق، أما في المترو هتنزل بدري لأن المترو نفسه بيتأخر حضرتك. يعني عادي جدًا تفضل مستني وقت يوصل لنص ساعة، بس ده مش كتير طبعًا. وبما إن في تأخير، تخيل انت شكل الزحمة.
3- ماتلبسش كويس
أيوة انت قريت صح، ماتلبسش كويس. علبة السردين اللي هتدخلها في المترو هتبهدلك. زحمة وخنقة وناس بتزقك وناس أعدة على الأرض، فرهدة للصبح. فلو مش ضروري تتشيك.. بلاش.
4- جزمتك مداس لكل الناس
أكتر حاجة بتنرفز الواحد في الدنيا، إن حد يدوس على جزمته. ودي بقى أكتر حاجة هتحصلك في المترو. ويا إما تسيب نفسك خالص وتستمتع بالموضوع لحد ما تنزل، أو تفضل ماشي بمنديل وتمسح.
5- أمِن على أشيائك
زحمة المترو زي أي زحمة، بتحصل فيها حاجات كتير من ضمنها السرقة. خد بالك من أشيائك كويس، محفظتك، موبايلك، سماعتك، أو أي حاجة مهمة. بدل ما تروّح من غيرهم.
6- قرّب من الباب قبل محطتك
دي أ ب ركوب المترو. علشان في وسط الزحمة والمعجنة اللي هتكون فيها، على ما توصل للباب علشان تنزل هيكون قفل. فيستحسن تلحق نفسك مش طالبة تأخير على مشوارك.
7- بلاش مترو خالص لو عندك مناسبة أو فرح
بما إنك هتلبس كويس وجزمتك ماينفعش تبقى مداس للناس، فياريت تستغنى عن المترو لو رايح مشوار مهم أو فرح مثلًا. صحيح هو بينجز وقت، بس بيمسح بهدومك قبل كرامتك الأرض. إلا لو مش هتركب محطات كتيرة.
8- الاشتراك ثم الاشتراك ثم الاشتراك
لو بتستخدم المترو بشكل يومي، يبقى الاشتراك ده أول حاجة تعملها. طبعًا انت عارف سعر التذكرة بقى كام. وضيف على ده إنك من غير اشتراك، هتقف في طابور زي بتاع العيش. فدي لو حدها تأخير زيادة.
9- المترو سوق كبير
شوف يا معلم، في المترو ده بيتباع من الإبرة للصاروخ. شوكولاتات وتاريخ صلاحية، لعب أطفال، مفكات ومفاتيح كهربا، لزقة الجروح، أقلام، حافظة كارنيهات، وحاجات تانية ماتخطرش على بالك. فبلاش تستغرب علشان ده موجود على طول.
10- خليك رويح وبلاش تجريح
وارد جدًا وسط المعمعة دي، حد يزقك، حد يخبطك ، كوع ييجي في جنبك، كف ييجي على وشك. في الأول هتتعصب وتتخانق، بعد كده هيجيلك تناحة. علشان ده بيحصل كتير. فخليك فريش كده وروق. ده لمصلحتك انت النفسية.
