الكريسماس قرب وأجواء الاحتفال بدأت تظهر في كل مكان. مش بعيد في شغلك تكونوا جبتوا شجرة كريسماس حلوة كده، وعلقتوا عليها الزينة واتصورتوا والكل فرحان. طبعًا جه وقت الهدية، وبدأ ماراثون "السيكريت سانتا". وكل واحد بيفكر يجيب إيه لمين. بس قبل ما تفكر في الهدية والمبلغ اللي هيضيع فيها، تعالى نفكرك إحنا بالتزاماتك المهمة يا باشا. يا اللي عايز تفرتك فلوسك في كلام فاضي:

1- الإيجار

نسيت إن في إيجار شقة هيتدفع خلال أقل من 10 أيام؟ في صاحب شقة هيفضل يرن عليك لحد ما التليفون يفرقع، وتبقى خايف ترد علشان مش معاك فلوس. احسبها انت لوحدك في 5 دقايق بس.

2- الأقساط

انت ممتلكاتك كلها أو أغلبها بالقسط. يعني في قسط عربية أو غسالة أو حتى موبايل. وانت أصلًا بتكمل عشاك نوم، والعملية مش ناقصة. تلاقيك افتكرت قسط حاجة دلوقتي وانت بتقرا.

3- الجمعيات

بما إن حياتك مليانة أقساط، فطبيعي حياتك فيها جمعيات لازم تتدفع. علشان انت مش نجيب ساويرس ولا أبو هشيمة. يبقى توفر فلوس الجمعية، وتنسى بقى شغل الهدايا ده.

4- اشتراك النت

قولنا كده هتعيش إزاي من غير فيسبوك والكوميكس إياها. ولا إنستجرام والاستوريز بتاعته. يا سلام بقى على فيديوهات السلحفة اللي بتاكل خس على يوتيوب. جدد الاشتراك واشتري دماغك بدل الهدية.

5- مواصلاتك

لو انت زي حالاتنا، من عامة الشعب اللي بتركب مواصلات. فانت أكيد عارف إن دي ميزانية شهرية لوحدها. سواء برنس وبتركب أوبر (والعياذ بالله)، أو مقضيها مترو. فمش هنتكلم كتير.

6- ديونك

انت أصلًا كحيان ومستلف من طوب الأرض، عايز تروح تشتري هدية يا فاجر؟ طب سدد اللي عليك الأول. وخد التقيلة بقى، برضو مش هتسدد كل اللي عليك وهتفضل مديون.

ميري كريسماس بإذن الله.