بهاشتاج "لا للتنمر"، نشر الفنان شريف منير فيديو من خلال حسابه على إنستجرام. بيرد فيه على الهجوم والتنمر اللي اتعرض له، من بعض متابعين على السوشيال ميديا. بعد ما نشر صورة لبناته كتعبير عن حبه ليهم.
ظهر شريف منير في الفيديو مع بناته (فريدة 16 سنة وكاميليا 12 سنة)، وأكد أنه هيتخذ الإجراءات القانونية ضد المسيئين له ولبناته. وطلب من المتابعين إنهم مايسكتوش عن أي أذى، تنمر، أو لفظ خارج يتعرضوا له على مواقع التواصل الاجتماعي. ويقدموا بلاغ للجهات المختصة عن أي شخص يسيء لهم.
View this post on Instagram
القصة بدأت يوم الأربع اللي فات، بعد ما نشر شريف منير صورة لبناته على إنستجرام، لكن فوجيء في الكومنات بسيل من الانتقادات والتجريح، له ولبناته. فاضطر تحت ضغط زوجته وبناته إنه يمسحها. لكنه أعاد نشرها وقرر يواجه المنتقدين بكل شجاعة. وحذر أي شخص هيتطاول عليه أو أي حد من أسرته، بإنه هياخد الإجراء القانوني ضده. اللي بيوصل للسجن أحياناً.
اتفاعل عدد كبير من رواد السوشيال ميديا مع الفيديو، واتصدر شريف منير تريند تويتر. ودشن المتابعين هاشتاج "ادعم شريف منير"، اللي أكدوا من خلاله رفضهم للتطاول على أي شخص. وإن كل واحد له في اختيار شكل حياته.
