أعلن المجلس القومي للمرأة، برئاسة الدكتورة مايا مرسي، عن تقدمه ببلاغ للنائب العام ضد الدكتور مبروك عطية، أستاذ الشريعة الإسلامية بجامعة الأزهر، على خلفية تصريحاته الأخيرة حول مقتل طالبة المنصورة نيرة أشرف.

وعبر المجلس عن غضبه واستنكاره من تصريحات "عطية"، خاصة اللي قال فيها: "عاوزة تحافظي على نفسك إلبسى قفة وإنتي خارجة".

ومن جانبها عبرت مايا مرسي عن صدمتها واستنكارها من كلام الشيخ الشهير، وأكدت إن الكلام ده ماينفعش يتقال من رجل دين! وأشارت لإنه كلام بيحقر المرأة وبيحرض على العنف والقتل ضدها، ودي جريمة يعاقب عليها القانون.  ووضحت إن اللي حصل من مبروك عطية مش هيتم التهاون فيه، وهيتقدم المجلس القومي للمرأة ببلاغ للنائب العام، النهارده، لاتخاذ الاجراءات القانونية اللازمة.

في الساعات اللي فاتت، حصلت حالة من الغضب والجدل على السوشيال ميديا، بعد انتشار لايف نشره الدكتور مبروك عطية على صفحته الشخصية بفيسبوك، وهو بيوجه نصائح للبنات بعد واقعة نيرة أشرف، وكان من ضمنها: "طالما الحجاب حرية شخصية، سيبي المهفهف على الخدود يطير والبسي محزق، هيصطادك اللي ريقه بيجري ويقتلك، لو حياتك غالية عليكي اخرجي من بيتكم قفة، لا متفصلة ولا بنطلون ولا شعر على الخدود".

ناس كتير اعتبروا الكلام ده فيه تبرير للواقعة الأخيرة وأي واقعة تشبهها في المستقبل، وانتشر هاشتاج بعنوان "#محاكمة_مبروك_عطيه"، وخلال الأيام الجاية هنشوف الموضوع هيوصل لإيه!