طول ما انت على فيسبوك، بتشوف الـ like هنا وهناك. اللي هي في العموم إعجاب بمنشور أو صورة أو حتى تعليق. لكن خلي بالك اللايك مش بس إعجاب، دي لها معاني تانية كتيرة. تعالى نتعرف عليها في السطور اللي جاية
فهمتك واتفقنا
دي لما تكون على كومنت من واحد صاحبك، بتتفقوا على حاجة معينة. ميعاد الخروجة الجاية مثلًا.
عارف إنك قاصدني
لما حد يكتب بوست موجه وفيه إسقاط لشخص معين، فيدخل يعمل له Like. ويقول له عارف إنك قاصدني وكلامك وصل يا بيه.
ليلتك سودة
دي لايك بتاعت مراتك أو صحبتك للكومنت بتاعك، على صورة زميلتك من الشغل وهي في المصيف مثلًا. كده انت دخلت في س و ج، وهنقول عليك يا رحمن يا رحيم.
براقبك وهراقبك
دي اللي بين وبين أصحابك علشان تنكشوا بعض. يعني لو صاحبك كتب كومنت عند حد، في موضوع انتوا متكلمين فيه قبل كده، وخصوصًا لو حاجة تضحك. تخبطه اللايك المتينة علشان تقوله إنك في ضهره زي ظله.
هقابل بابا إمتى؟
دي بتاعت الكراش بقى يا معلم. لما ولد تكون عجباه واحدة معينة، ويفضل مقضيها لايك لكل حرف بتكتبه. صورة هنا، بوست هناك. ده هيعمل لايك حتى للصفحات اللي هي عليها. يمكن البعيدة تحس بأي حاجة.
