من حق كل بنت تهتم بنفسها، والاهتمام مش معناه اهتمام بالجمال وبس، معناه كمان اهتمام بالثقافة والصحة والحالة النفسية، وعلشان نفسيتك تكون أجمل أنت محتاجة تنبسطي وتخرجي وكمان تهتمي بجمالك وشبابك. علشان كده إحنا جيبنا لكم عصارة قعدتنا على إنستجرام واللي هتخليكم شباب على طول، 5 حسابات بريحة اللافندر كده، تابعوهم هتنبسطوا.
سلمى حسين
عارفة الألوان المطرقعة الموجودة في باليت الآيشادو، وهتموتي وتجربيها بس في سبب غامض بيمنعك! سلمى بقى كسرت "التابو" ده، وطول الوقت هتلاقيها مبهجة كده، وبتجرب ألوان بعيدة عن بعض على بعض، والغريب إنها بتطلع تحفة، وهتحسسك إنك عايزة تجربيها حالًا من حلاوتها.
تقدري تتابعيها من هنا.
رنا سعيد
تستحق سقفة على فقرة "خطير بس رخيص"، ودي سلسلة فيديوهات بتعملها كل كام يوم، بتجرب فيها منتجات للبشرة والشعر، وتقولك خلاصة تجربتها، ومع الوقت فكرتك عن المنتجات الغالية وكمان الرخصية هتتغير خالص، وهتتعلمي تلاقي البدائل لكل حاجة.
تقدري تتابعيها من هنا.
جيلان نصر
لو لسه مبتعرفيش تحطي "ميكب" بثقة. جيلان مش بس هتساعدك تفهمي بشرتك أكتر، كمان هتتعلمك تحطي "ميكب" لايق على ملامحك إنت بالذات، وبين السطور كده، هتقولك إزاي تقشري بشرتك في البيت بمنتجات سعرها بسيط، ودي خطوة هتفرق معاكي جدًا.
تقدري تتابعيها من هنا.
جوليا كيرلز
جميلات الكيرلز عندكوا طلعة على أكونت من الآخر، كل اللي محتاجة تعرفيه في عالم الكيرلي هتلاقيه، مش كده وبس، لو كنتي محجبة وعامله ستايلنج لشعرك، هتتعلمي تحافظي عليه تحت الحجاب، علشان يقعد معاكي أطول وقت ممكن.
تقدري تتابعيها من هنا.
ياسمين الططاوي
هنا بقى هتلاقي ريفيوز للصبح، طول الوقت بتظهر حوالينا منتجات جديدة، ياسمين بقى هتوفر عليكي كتير، وهتشوفي المنتج عليها قبل ما تشتريه، هتساعدك كمان تاخدي قرار الشراء الصح.
تقدري تتابعيها من هنا.
