يمكن لأنه مابيحبش الظهور الإعلامي الكتير، تصدر الفنان هاني سلامة تريند جوجل، بعد لقائه مع الفنانة إسعاد يونس في برنامجها "صاحبة السعادة"، واللي اتعرض الجزء الأول منه مؤخرًا.. "هاني" اتكلم في حاجات كتير، يالا نعرف أبرزها:

1 - مابحبش اتكلم عن حياتي الشخصية ولا اتصور كتير على السوشيال ميديا.

2 - أبويا علمني أفكر في أي حاجة مرة واتنين، وأنا مابحبش أشيل حد همي خالص، لكن ممكن أشيل هموم ناس تانية سواء من العائلة أو الأصدقاء.

3 - قررت التواجد على السوشيال ميديا بسبب "كورونا"، لإنها قربت الناس أكتر وقتها.

4 - في أول مقابلة مع يوسف شاهين، سألني على الأفلام اللي اتفرجت عليها، ولما ماقولتش فيلمه "باب الحديد"، رد عليا وقالي "أنت حمار".

5 - بستغرب من إن بعض الناس بتشوفني مغرور، الموضوع ده كان شاغلني وموترني فترة، وكنت بسمع ردود غريبة، زي إن شكلي وأنا ساكت مغرور.

6 - اتقالي إن فيه صفحات مزيفة كتير على السوشيال ميديا، بتنتحل اسمي وشخصيتي، وبتقوم بالنصب على جمهوري وبتطلب منهم فلوس باسمي.

7 - التمثيل ماكانش في دماغي، وعمري ما حلمت بالموضوع ده، وصدفة غريبة دخلتني المجال، لما كنت بلعب بلياردو مع أصحابي في أجازة الثانوية العامة، فصاحب الصالة عرض عليا أشارك في إعلانات، فوافقت وبعتني لمكتب الإعلانات، والمكتب عرضوا عليا التمثيل، وبعتوني لمكتب يوسف شاهين، ومن هنا ابتدت الحكاية.