في أول حفلاته، بعد رجوعه في قرار الاعتزال، اتعرض الرابر مروان بابلو، لأزمة كبيرة من المتوقع تهدد مستقبله الفني والغنائي خلال الفترة الجاية.

اللي حصل، هو إن خلال حفلته اللي قدمها مساء الجمعة 1 أكتوبر، وحضرها أكتر من 20 ألف شخص، صعد على المسرح رابر فلسطيني اسمه "شب جديد"، علشان يقدم فقرة صغيرة مع بابلو، لحد هنا والدنيا تمام، لكن الغريب بقى لما قدم الابتهال الديني الشهير "مولاي" للنقشبندي، واستبدل فيه كلمة "مولاي" بـ "مروان".

طبعًا الأمر ده اتسبب في انزعاج وغضب نقابة الموسيقيين، وأصدرت قرار فوري، بمنع التعامل مع مروان بابلو، خاصة إنه مش عضو في النقابة، وكان حصل على تصريح ليوم واحد بس.

واعتبرت النقابة إنه تم السخرية من الدعاء وإفراغه من محتواه الأخلاقي، ومع إن مروان مش هو اللي غنى الابتهال، زرغم إن "شب جديد" اعتذر رسميًا على حسابه الرسمي على فيسبوك، إلا إن النقابة أخطرت كل الجهات والهيئات والمتعهدين بالقرار ده، واعتبرته هو المسؤل.

وبالمناسبة، من حوالي أسبوعين، أصدرت نقابة الموسيقين قرار شبه ده، أعلنت فيه منع عدد من مطربين المهرجانات والرابرز من الغناء، وهم: "عفروتوـ مروان موسى، ريشة، كوستة، سمارة، فرقة الصواريخ، محمود معتمد، دبل وزوكش، كزبرة و حنجرة