بعد تصريحاتها الأخيرة مرة جديدة اتجدد الخلاف بين الفنانة ياسمين صبري ووالدها الدكتور أشرف صبري، على خلفية تصريحاتها الأخيرة في حلقة حوارية من برنامج "سبيس"، اللي أطلقها الكاتب تامر عبده أمين، على موقع تويتر.

في الحلقة دي "ياسمين" اتكلمت عن تفاصيل كتير تخص حياتها الشخصية، وقالت :"أنا كنت عايشة في إسكندرية في أسرة متوسطة، ومصروفي كان قليل جدًا ولو خلص مع نفسي، وكنت عايشة في بيت جدي وجدتي، وفي مرحلة من حياتي كنت في مدرسة حكومية".

الكلام ده استفز والدها جدًا، ومقدرش يتمالك نفسه، وقرر يرد على كل التصريحات دي، وقال إنها كانت في مدرسة الـ"EGC" أرقي مدارس إسكندرية في وقتها، وإنها اتولدت عندها شغالة فلبينية، وكانت بتلبس من باريس، لأنه كان بجيب لها لبسها من هناك.

ووجه كلامه ليها وقال: "هو الكدب في حد يوصل للدرجة دي؟ أنا أفهم الكدب لما تبقي غلبانة وتكدبي تقول أنا من عيلة كبيرة ومدارس أجنبية وعيشت في سراية وبابي كان وزير وهو بيشتغل عامل! يبقي كذب له مبرر!. لكن واحدة عاشت في فيلا بحمام سباحة وصالة جيم، ولها غرفة خاصة بحمامها، وكانت بليدة، وطلعت روحي، ويا دوب تنجح بالعافية بخمسين في المية، وكانت بتروح الكلية بالعافية، وأصحيها الصبح بالساعة عشان تروح الكلية وتترفد في السنة مرتين، وعميدة كلية إعلام بيروت موجودة وتشهد..كنت أروح دايما أقدم اعتذارات وشهادات طبية عشان ترجع الكلية وشهاداتها عندي كلها كحك وأبوها دكتور..تطلع تدعي إنها عاشت حياة بائسة وغلبانة وبتكمل باقي الشهر من غير فلوس!"

وأضاف: "إيه الكدب والفيلم المتخلف ده، إنتي عايشة دور تمثيل ورثاه من جد والدتك سيد سليمان..وبتكدبي ليه؟ حتاخدي نشان يعني على خيبتك وفقرك وصلتي وبقيتي حاجة؟ إنتي بالنسبة لأبوكي حتة عيلة مش فاهمة بتعملي إيه غير إنك بتشوهي اللي رباكي عشان الناس تسأفلك..حتي أخوكي بهدلتيه اللي طول عمره جنبك وبيجي من آخر الدنيا عشانك!".

وفي آخر البوست قالها: "ياشيخة بطلي اللي أنتي فيه ده، وحسبي الله ونعم الوكيل فيكي..بطلي تجيبي سيرة عيلتك وأبوكي اللي رباكي منك لله".

لحد دلوقتي ياسمين التزمت الصمت، ومردتش على تصريحات والدها خالص، بس نشرت فيديو على إنستجرام، بتدعم خلاله المرأة، وبتشجيع على خلق عالم يؤمن بالمساواة بين المرأة والرجل.