بدأ السباق الدرامي لرمضان 2021، وقنوات كتير بدأت تعرض مسلسلاتها، وكالعادة كلنا لسه في مرحلة المتابعة، لحد ما نشوف المسلسل اللي هيشدنا أكتر، ونتابعه طول الشهر، وأغلب الأخبار الفنية اللي بنتابعها حاليًا بتتكلم عن تفاصيل وكواليس الأعمال الفنية، لكن الأمر مختلف مع مسلسل "كله بالحب"، واللي أغلب أخباره عن مشاكل وأزمات.. تعالوا نعرف التفاصيل.

بداية أزمة مسلسل "كله بالحب"، اللي بتقوم ببطولته الفنانة زينة، كانت مع الفنان أحمد السعدني، واللي أعلن من ساعات عن انسحابه من تصوير المسلسل، وكتب على صفحته الرسمية على موقع التواصل الاجتماعي فيسبوك: "أعلن بشكل رسمي انسحابي من المسلسل المهزلة، وتقدمي بشكوي رسمية للنقيب الدكتور أشرف ذكي ضد شركة الإنتاج، للخرق الواضح للعقد الموقع مع الشركة، متمسكًا بكافة حقوقي المادية وآسف للإزعاج مرة أخرى ورمضان كريم".

وبعض المصادر المقربة من السعدني قالت إن السبب هو إن الفنانة زينة بتتدخل في المونتاج، ده غير إن منتح العمل كان وعد "السعدني" إنه يكون له بوستر بمفرده في العمل لكن ده ماحصلش.

وبعد انسحاب "السعدني" بوقت قليل، أعلن الفنان مصطقى درويش هو كمان انسحابه من العمل، وأكد على حسابه على "فيسبوك"، إنه مش هيسكت وهيرفع قضية على الشركة المنتجة، وبعد عرض الحلقة الأولى منه، كتير من المشاهدين لاحظوا ظهور اسم الفنانة زينة في تتر البداية 3 مرات، ودي حاجة ماحصلتش قبل كده في الأعمال المصرية.

وكان "السعدني" هاجم من فترة زينة وكتب على حسابه الرسمي على فيسبوك: "الحقيقة أنا عمري ما عملت مشكلة في شغلي وعمري ما أختلفت مع زمايلي إنما أنا اللي بيحصل معايا في المسلسل اللي شغال فيه 24 ساعة مبروحش بيتنا عشان يلحق العرض، والواحد ساكت وبيعدي بلاوي عشان الزنقة والظروف، أنا متربي في ستوديوهات، كبرنا، أنا واللي زيي اللي كان بيتقال عليهم أبناء الفنانين كأنها شتيمة، على احترام مهنتنا مواعيدنا ومذاكرتنا وتحضيرنا للشغل احترامنا للكلمة قبل العقد".

وأضاف: "للأسف شركة الإنتاج ملتزمتش معايا باتفاقها اللي على أساسه وافقت اشتغل وكان شرط أساسي لقبولي الشغل معاهم والحقيقه أول مرة أشوف تصميم دعاية عمل فني من أفيشات وبرومو بتعمله زميلة في العمل، طول عمري كنت فاكرها من اختصاص شركة الإنتاج".

وتابع: "أنا بعتذر لأي شخص بيحبني عن تواجدي في هذا العمل لأن الحقيقة اللي بيحصل ده مهزلة". من ناحيتها رفضت الفنانة زينة التعليق على انسحاب زملاء لها من المسلسل، اللي واضح جدًا إن انسحاب نجومه واحد ورا التاني هتهدد قدرته على المنافسة في شهر رمضان.

المسلسل بطولة الفنانة زينة، وإخراج عصام عبدالحميد، وبيشارك في بطولته الفنانة صابرين، وباسم سمرة، وكريم قاسم، وسامر المصري.