بعد قرار تعطيل الدراسة، الوقت اللي هتقضيه في البيت هيزيد. طبعًا هتأنتخ ومش هتلاقي حاجة تعملها علشان تزق بيها اليوم. فطالما الموضوع فيه أنتخة وقعدة مطولة في البيت، تعالى نقول لك على شوية اقتراحات هتفيدك في اليومين دول. علشان تبقى أنتخة مفيدة أو على الأٌقل ماتبقاش مملة:
1- اتعلم لغة جديدة
في مواقع وتطبيقات وبودكاستس كتير، بتساعدك تتعلم لغات جديدة في وقت قليل وببلاش. الموضوع مفيد ومسلي في نفس الوقت.
2- طور موهبتك أو الحاجة اللي بتحبها
لو عندك هواية زي الرسم أو المزيكا، تقدر تشوف فيديوهات تساعدك تنميها. أو لو بتحب الطبخ مثلًا، دي أحلى فرصة تبدع وتطلع الشيف شربيني اللي جواك.
3- أفلامك ومسلسلاتك مع اللب والسوداني
لو انت أفلامجي وبتاع سينما، فدي الفرصة الذهبية لماراثون الأفلام والمسلسلات بتاعك. لابك على رجلك، والهارد المليان أفلام، وانطلق في رحلتك السينمائية الممتعة. ولو عايز تشوف حاجة مش عندك، يبقى تتابع تقييمات الأفلام على IMDb و Rotten tomatoes. وتختار منها اللي هتشوفه.
4- قراية وكتب
لو انت بقى غاوي قراية، فالكتاب هو خير صديق في الوقات دي. لو عندك حاجات بتحبها طبعًا هتقراها، وكمان تقدر تقرا في حاجات جديدة غير اللي متعود عليها. مين عارف يمكن تحب نوع جديد من الكتب أو المعلومات في مجال معين.
5- رتب أوضتك
دي فرصة عظيمة تاخد بصة على أوضتك، اللي صوت والدتك مسمع آخر الشارع بسببها. وتبدأ ترتبها وتنفضها من أي حاجة مش ضرورية. افرز حاجتك شوف انت مش محتاج إيه واتبرع بيه، سواء لبس أو أي حاجة مش بتستخدمها. هتفضي مكان عندك وهتبسط غيرك أكيد.
6- العب رياضة
لو انت على طول بتمارس الرياضة، مفيش حاجة هتمنعك حتى القعدة في البيت. فيه تطبيقات كتير بتعرفك تمارين تلعبها وانت في البيت، من غير معدات أو أجهزة. مش بعيد تلاقي نفسك في الصيف عامل فورمة الساحل، وتنطلق بقى.
وفيه حاجات تانية كتير ممكن تكون أهم بالنسبة لك، تقدر تعملها في وقت القعدة في البيت. علشان تطلع مستفيد بكل الوقت بالشكل اللي يناسبك.
