من ساعات قليلة، اتعرض بيت الفنان محمد هنيدي في الدقي، لحادث حريق بعد انفجار تكييف موجود في أحد الغرف، لكن تم السيطرة على الحريق، وربنا نجاه هو أسرته.
وعلشان الحادثة دي، اتكررت أكتر من مرة، قولنا في "كلام القاهرة" نقول لكم على شوية نصائح هتجنبكم بعض الكوارث المحتملة للتكييف خاصة مع ارتفاع درجة حرارة الجو في الصيف:
-في البداية، ضروري يتم إجراء صيانة للتكييف بشكل دوري يفضل يكون كل شهر.
- إهمال نظافة محتويات التكييف، من الحاجات اللي ممكن تسبب انفجاره مع الوقت، حاول تنضف التكييف كل أسبوعين أو كل 100 ساعة، كده هتحس بفرق كمان.
-وأنت بتنضف التكييف، ابعد خالص عن استخدام الجازولين أو البنزين أو التنر أو سائل المبيد الحشري أو أي مواد كيميائية في عملية التنظيف.
-قبل ما تركب التكييف، اتأكد إن مصدر الكهرباء اللي واصلة له مناسبة لقدرته الكهربائية، علشان لو كانت أقل هتتسبب في ارتفاع حرارة الأسلاك، وممكن تحصل مشكلة كبير، لا قدر الله.
- ماتسيبش التكييف شغال وأنت بره البيت، حاول تفكر نفسك بده، علشان مايحصلش ماس كهربائي خاصة لو قعدت وقت طويل.
- على قد ما تقدر حافظ على مركب التبريد من التسريب، ودي خطوة مهمة جدًا.
- ضروري تنضف فلتر التكييف كويس، وتتأكد إن مافيش أي شئ عالق فيه، ويستحسن تغيره باستمرار.
- كل ما شغلت التكييف فترة طويلة، كل ما زادت درجة حرارته، وتعرضه لأعطال مفاجأة ممكن تسبب مشاكل كبيرة.
- لو سمعت صوت مش طبيبعي طالع من التكييف، يفضل إنك تقفله وتطلب فني مؤهل، علشان يحدد إيه المشكلة ويحلها.
