على مدار سنين طويلة، شوفنا أفلام ومسلسلات ناقشت قضايا الناس وهمومها، وقدرت تغير واقعهم للأفضل، ده بالظبط اللي بنعيشه مع مسلسل "فاتن أمل حربي"، واللي كان بيحكي معاناة الستات بعد الطلاق.
ومؤخرًا، دعى الرئيس عبد الفتاح السيسي كل الجهات المسؤلة عن قانون الأحوال الشخصية زي الأزهر والبرلمان والحكومة، لـ صياغة قانون عادل ومتزن. وده في مداخلة هاتفية مع الإعلامية عزة مصطفى في برنامجها "صالة التحرير".
الخطوة دي اعتبرها نجوم العمل نجاح كبير للرسالة اللي كانوا بيحاولوا يوصلولها على مدار الحلقات، لكن من ناحية تانية أكدت بعض المصادر إن اهتمام مصر بملف المرأة كان سابق بالفعل عرض المسلسل.
وعبر الفنان شريف سلامة عن سعادته كمواطن قبل كونه فنان بعد سماع قرار الرئيس بتعديل قانون الأحوال الشخصية، وقال كمان إنه حاسس بفخر لنجاح العمل وإنه بالفعل قدم رسالة فنيه ليها هدف.
وقدمت نيللي كريم الشكر للرئيس على اهتمامه ودعمه للمرأة، وأكدت على إنها كانت متوقعه فكرة العمل تلاقي دعم بعد عرضها.
سواء كانت دعوة الرئيس المصري سببها الجدل اللي حققه المسلسل أو لأ، إحنا نتمنى نشوف أعمال ناجحة ومؤثرة أكتر.
