الفترة اللي فاتت سيطرت أغاني المهرجانات على الساحة الفنية والشارع المصري. خاصة مهرجان "بنت الجيران" للثنائي حسن شاكوش وعمر كمال، اللي بسببه قررت نقابة المهن الموسيقية، برئاسة الفنان هاني شاكر، منع كل مطربين المهرجانات من مزاولة المهنة. وكمان حذرت المنشأت السياحية والنوادي من التعامل معاهم.

القرار أثار جدل كبير بين مؤيد ومعارض، لكن عدد كبير من الفنانين كانوا معارضين للقرار. وأعلنوا تأييدهم لأغاني المهرجانات بأكتر من طريقة، من خلال وسائل التواصل الاجتماعي.

تعالوا نشوف رد الفنانين على قرار منع المهرجانات:

رانيا يوسف 

 
 
 
 
 
View this post on Instagram
 
 
 
 
 
 
 
 
 

تلاقيني لسه بخيري 💃💃💃

A post shared by Rania Youssef (@raniayoussef_) on

نشرت الفنانة رانيا يوسف، فيديو على حسابها على إنستجرام، وهي بترقص على أنغام مهرجان"بنت الجيران". كنوع من إعلان حبها لأغاني المهرجانات. وكتبت رانيا على الفيديو: "تلاقيني لسه بخيري".

إيمان العاصي

الفنانة إيمان العاصى هي كمان شاركت جمهورها على إنستجرام، بمقطع فيديو وهي بترقص على مهرجان "بنت الجيران". وكتبت: "بعد إذن استاذ هاني".

محمد هنيدي

أما الفنان الكوميدي محمد هنيدي، نشر صورة له من فيلم "جائنا البيان التالي"، وعلق بطريقة ساخرة: "وتجيشني تلاقيني ليسه بخيري".

لقاء الخميسي

 
 
 
 
 
View this post on Instagram
 
 
 
 
 
 
 
 
 

اول مره أتكلم وأقول رأيي المتواضع في اي حاجه بتحصل ! الدنيا قايمة على موضوع شاكوش والأغنية والحفلة اللي ف الاستاد وعيد الحب .. ١- انا مش مع وقف مغني خد تصريح قبل كدا من الرقابه وبيقدم لون شعبي وليه جمهور عريض .. بالعكس انا مع احتضانه والاتفاق معاه بإنه يختار كلمات الاغنيه بعنايه طالما انا عندي يقين انه ممكن يفيد البلد في تقويم الجمهور .. قصدي نلعبها بصياعة ويبقى بيقدم فنه بس بكلام متنقي وشعبي وسهل برده . ٢- اتنين بقى .. الاستاد دا مكان مهم جدا .. حرم كروي اذاً اي حفله بتتقدم فيه لازم تبقى على قدر وضعه لانه كمان الحفله بتتعرض على الهوا. وانا مش شايفه من رايي ان الحفله اساساً مكانها الاستاد بس اذا افترضنا ان مافيش غيره، يبقى لازم ننتقي المغنيين والفنانين بقى . حفلة معروضه ع الهوا ل شعب كامل يبقى انا اللي اختار واجهة للعالم وللشعب . مغني مصري ناجح في بلده وناجح عالميا" مش مغني مهرجانات لانه دا لون من الوان الغنا لكنه مش واجهة الفن المصري الأصيل اللي اترسمله شخصيه من سنين السنين .. فكرة الاختيار والتوقيت والمكان ... هو دا الصح لكن تمنع مغني ليه جمهور يغني انا مش شايفه ان دا حل ! الحل هو الاحتضان وانه يتوجه صح طالما ليه جمهور عريض وممكن نستفيد منه . شكرا

A post shared by Lekaa Elkhamissi (@lekaa.elkhamissi) on

نشرت بوست على إنستجرام، وضحت فيه إنها ضد قرار منع مطربين المهرجانات من الغنا. واقترحت حل احتضانهم وتوجيهم صح.

رامي صبري

المطرب رامي صبري وجه رسالة للفنان هاني شاكر على فيسبوك، طالبه فيها بمحاولة التوصل لحل في مشكلة مطربي المهرجانات. واقترح وضع اتفاق محدد ومكتوب بقواعد النوع ده من الأغاني. لكن بدون قطع رزقهم.

هشام ماجد

أعلن هشام ماجد تضامنه مع أغاني المهرجانات، ونشر على فيسبوك مقطع فيديو لمهرجان "خلصانة بشياكة". وقال: "متضامن مع المهرجانات".

مصطفى خاطر

عبر الفنان الكوميدي مصطفى خاطر عن حبه لأغاني المهرجانات. واتمنى الأزمة دي تعدي على خير علشان عايز يرقص.

أروى جودة

قالت من خلال حسابها على تويتر، إن منع النوع ده من الأغاني مش أفضل فكرة. واقترحت وضع ضوابط لكلمات الأغاني.