أعلن الجهاز المركزي للتعبئة والإحصاء، عن وصول عدد سكان مصر في الداخل لـ 100 مليون نسمة. ومعدل السرعة في الزيادة بيأكد إننا بلد ولادة فعلًا. وبالمناسبة دي قولنا نحط كده سيناريو تخيلي، لشكل الحياة في مصر كمان 10 سنين مثلًا، وإحنا عمالين نزيد:
- اليوم كله ساعة ذروة
وقتها ساعة الذروة اللي عارفينها دي هتكون للعيال التوتو، اليوم كله هيبقا ذروة. ومش هنشوف الروقان بعنينا غير ساعة ولا حاجه.
- المواصلات بدورين
المواصلات من الحاجات اللي هتتأثر جدًا بالزحمة. وهنلاقي كل وسائل المواصلات في الشوارع بقت بدورين، علشان تستوعب الأعداد المرعبة دي.
- الروف والعشوائيات هم المدن الجديدة
صحيح في ناس كتيرة ساكنة على أسطح العمارات، بس ده هيبقى أساسي بعد كده. مفيش سطح هيكون مش مسكون. والعشوائيات هتزيد هتبقى جزء من التخطيط العمراني.
- الأكل والشرب بحساب
ده مش علشان انت كحيان يامحمااه.. لا خالص، إنت مضطر يامعلم ومفيش أوبشن تاني. لأنك لو زودتها في الأكل النهارده، مش هتاكل خالص بكرة ولا بعده. ونفس الكلام على المياه.
- المصالح والشركات هتشتغل 3 شيفتات
نظام الشغل ومواعيده اللي مش عاجباك دي هتتغير خالص، واحتمال تلاقي نفسك شغال من 12 لـ 8 الصبح. علشان في شيفتين تانيين في الشركة بالنهار. ولو مش عاجبك اعترض بقى، في مليون غيرك بيحلموا بفرصتك.
- طوابير المواصلات هتبقى بالحجز
يعني مش كفاية إن في مواصلات بيبقى عليها طوابير أصلًا، الطوابير دي بقى هتكون بالحجز. يعني تعمل حساب مشوارك قبله بكام يوم، وتشوف لو الطابور فيه مكان فاضي أو لأ.
- اشتراك الإنترنت بالساعة
الإنترنت في البيت هيبقى زي السايبر، بالساعة. وكمان هيتحدد لك كام ساعة في اليوم. سياسة الاستخدام العادل بقى وانت فاهم. فحدد أولوياتك وانسى جو السهر طول الليل على يوتيوب ده.
- تحديد النسل إجباري
اللي يتجوز له طفل واحد، بداية من الطفل التاني هتدفع ضرايب وتكاليف أي حاجة يعملها. تعليم، تموين، رعاية طبية. كل شيء بتمنه، واتصرف بقى.
- التعليم الابتدائي هيبقى 10 سنين
البلد هتلاحق على مين ولا مين في التعليم الجامعي؟ فالتعليم الابتدائي يبقى 10 سنين، لحد ما يتصرفوا لهم في مكان جوة الجامعات.
- فيلمين لكل قاعة في السينما
الضغط مش هيكون في الحياة العملية بس، هيخش على الرفاهية كمان. فلو حبيت ترفه عن نفسك وتدخل سينما، ساعتها قاعات السينما هيكون فيها شاشتين مش واحدة. وبتعرض فيلمين في وقت واحد، علشان الناس كلها تتفرح وتتبسط.
اسرح بقى بخيالك، وشوف الزحمة دي هتأثر على إيه كمان في حياتنا.
نعقل كده ياجماعه ونكتفي بالطفلين اللي عندنا.
