يوم الاتنين اللي فات، اتوفى عالِم الكمبيوتر "لاري تيسلر". عن عمر 74 سنة. "تيسلر" هو مخترع خاصية الـ (cut - copy - paste) في أجهزة الحاسب الآلي. واللي بفضلها اتسهلت علينا خطوات كتير، في برامج تحرير النصوص وأنظمة تشغيل الكمبيوتر.
فتعالوا نتعرف أكتر على ابتكارات وإنجازات المخترع العظيم "تيسلر":
- اتولد سنة 1945 في نيويورك. ودرس علوم الكمبيوتر في ستانفورد.
- سنة 1973، انضم لمركز بالو ألتو للأبحاث (PARC) من زيروكس. وهناك طور تقنية القص والنسخ واللصق.
- انضم شركة آبل من سنة 1980 لحد 1997. اشتغل على أكتر من منتج للشركة زي: Macintosh - Quick Time - Lisa - Newton Tablet.
- وصل لمنصب كبير العلماء سنة 1993، وكان له دور قوي في تطوير نظام التشغيل نيوتن "MessagePad". اللي دخل السوق العالمي بس مانجحش.
- اشتغل على برنامج بدء التشغيل Stagecast، اللي انتجته شركة آبل. كمان اشتغل فترة في أمازون وياهو.
- في 2009 أسس عمله الخاص. واستمر في تقديم الابتكارات التكنولوجية لحد نهاية حياته.