الغطاس المصري "تامر سلمان"، قدر يساعد السيدة الإنجليزية "سو أوستن" من ذوي الاحتياجات الخاصة، إنها تنفذ غطسة على عمق 24 متر. في محمية رأس محمد في شرم الشيخ، جنوب سيناء.
القصة بدأت من سنين لما "أوستن" كانت بتحب رياضة الغطس، وأخدت كورسات غطس كتيرة. لكنها أصيبت بمرض جيني في العضلات والأعصاب، أدى لتوقف الحركة تمامًا. وبقت بتتحرك بكرسي متحرك.
بعد الإصابة توقفت "أوستن"عن أي نشاط. لكن بعد فترة قررت تتحدى المرض، وترجع لرياضة الغطس من تاني. فكونت فريق من أصدقائها أغلبهم غواصين محترفين. اللي قدروا يصمموا كرسي مخصص للغطس، بعد فترات طويلة من التجريب في حمامات السباحة والبحيرات الباردة.
انتشرت قصة "أوستن" في إنجلترا، ومنظمات كتير اتبنت مشروعها وقدموا لها الدعم الكامل. واتقدمت لها عروض كتيرة من أماكن غطس مختلفة، لكنها اختارت شرم الشيخ تحديدًا. لأنها زارتها كتير قبل الإصابة، وحبتها جدًا.
في شرم الشيخ تم اختيار مركز الغطس اللي بيشتغل فيه "تامر سلمان"، واللي بدوره انضم لفريق "أوستن". وأصبح هو مسئول بشكل مباشر عن تأمينها طول فترة التجارب والإعداد. لحد ما نفذوا الغطسة.
وقال "سلمان" إن دي من أصعب غطسات البحر الأحمر بسبب قصر مسافتها، تعدد التيارات المائية في منطقة المحمية. ده طبعًا بالإضافة إن بيتم تنفيذها بكرسي متحرك. لكنه كان مبسوط جدًا قدر يحقق حلم "اوستن". اللي بقت أول شخص يقوم بتجربة زي دى.
تحية كبيرة لسلمان وكل الفريق اللي قدروا يحققوا شيء كان أقرب للمستحيل.
