خلاص بقينا في رمضان مش بنستنى مسلسلات بس، ده إحنا بنستنى الإعلانات كمان. ومع الظروف غير العادية اللي بنعيشها الفترة دي، برضو إعلانات رمضان لحد دلوقتي غير عادية. جت مناسبة للظروف وقدرت تلمسنا من أول يوم. وما بين النوستالجيا ولمة العيلة، اتنوع محتوى الإعلانات وأغانيها. فتعالوا نشوف أكتر أعلانات شدتنا لحد دلوقتي:
قادرين - صيدليات 19011
إعلان بريحة ذكريات زمان، ويعتبر من مفاجآت رمضان السنة دي. لإننا بنشوف نجوم التسعينات: مصطفى قمر - حميد الشاعري - هشام عباس - إيهاب توفيق، بيجمعوا من تاني بعد أكتر من 20 سنة. واللطيف إن تفاصيل الإعلان بتعمل حالة نوستالجيا كده، لما تشوفه بترجع لذكريات شريط الكاسيت والراديو والووكمان وبنك الحظ.
عزوتنا ملايين - فودافون
على صوت الفنانة شيرين، اتجمع عدد من الفنانين والنجوم مع أهلهم أصحابهم. بس وهم مطبيق العزل الصحي. طبعًا كل المشاركين ظهروا من جوه بيوتهم، والإعلان بيقول إن اللمة ممكن تكمل عن بعد بدون مشاكل. شارك في الإعلان نجوم كتير منهم: اللاعب محمد صلاح وبنته مكة - منى زكي وأطفالها - عبد الرحمن أبو زهرة وأحفاده - إسعاد يونس - أحمد فهمي وهشام ماجد وشيكو.
انت استثنائي - بنك مصر
كوكتيل بهجة وطاقة إيجابية هتحس بيهم، أول ما تسمع صوت الفنان بهاء سلطان في أغنية "انت استثنائي". اللي رجع تاني على الشاشة بعد غياب سنين. وطبعًا بيشاركه الفنان محمود العسيلي، اللي بقى صوته ماركة مسجلة في إعلانات بنك مصر.
سنة الحياة - أورانج
تقريبًا مابيختلفش اتنين على صوت النجم حسين الجسمي، اللي أبهرنا بأغنية "سُنة الحياة" في إعلان أورانج. ومن غير ما يظهر في الإعلان. إحساس اللمة بعد فراق طويل بيكون له طعم مختلف، وصوت الجسمي في الإعلان وصل لنا الإحساس ده بكل تفاصيله.
لن ينسانا الله - زين
وجِه إعلان شركة "زين" أجمل رسالة إنسانية خلال الأزمة، وشجع الناس على مساعدة بعض في الظروف الصعبة االي بنمر بيها. أغنية "لن ينسانا الله" لمست قلوب كل اللي شافوا الإعلان، اللي بدأ بجملة "إلى أن يرى اللقاح النور.. كونوا لقاح بعض. وتآخوا فكلنا أبناء الأرض".
