مؤخرًا، طرحت قمة "صوت مصر" حلقة خاصة في الموسم الجديد من حوارات "صوت مصر – تغيير الواقع" بعنوان "صناعة السينما والهوية المصرية"، دخلت من خلالها عالم صناعة السينما في بلدنا، وناقشت من خلالها موضوعات مختلفة، منها دخول الدراما عصر المنصات الرقمية، ومستقبل السينما والتليفزيون في ظل الواقع الجديد، وتأثير أزمة كوفيد 19 على الصناعة، وده من خلال حوار مع مدير التصوير والمخرج السينمائي أحمد المرسي، والمنتج طارق الجنايني المؤسس والرئيس التنفيذي لشركة TVISION Media Production.

وأكد أحمد المرسي مدير التصوير والمخرج السينمائي، أن صناعة السينما والميديا بشكل عام تطورت بشكل كبير في الفترة الأخيرة، خصوصًا في مستوى الصورة اللي تطور بشكل واضح في السنوات الأخيرة، واختلف في الأعمال الدرامية خاصة وكمان في الأعمال السينمائية.

"المرسي" أشار كمان للتطور غير المسبوق في صناعة الميديا بشكل عام، وإنه أصبح فيه وسيط إعلامي جديد هو المنصات الرقمية اللي انتشرت بسرعة كبيرة، واللي أتاحت فرصة كبيرة من التنوع في العرض والأذواق ومابقتش المنافسة بس بين السينما والتليفزيون، واعتبر التنوع ده مفيد للجمهور ولصناع الدراما، وكمان هو فرصة كبيرة  للشباب الطموحين لإنتاج أعمال سينمائية بجودة عالية من خلال التليفونات المحمولة والكاميرات الرقمية.

كمان أعرب "المرسي" عن سعادته بالمشاركة في احتفالية نقل المومياوات الملكية، وشعورة بالفخر بالنتيجة اللي ظهر عليها العمل وردود الفعل المحلية والعالمية تجاه الحدث اللي أبهر العالم.

أما المنتج السينمائي طارق الجنايني المؤسس والرئيس التنفيذي لشركة TVISION Media Production فقال إن المنصات الرقمية أصبحت واقع ملموس وبتمثل التوجه العالمي مؤخرًا، وأصبحت المنصات دي بتتصدر معظم الإعلانات في دول أمريكا وأوروبا، وتوقع إنه خلال فترة وجيزة مش هتتعدى الخمس سنوات هيتحول التليفزيون لتقديم برامج حوارية وأحداث رياضية وقنوات إخبارية بس، وباقي الأشكال هتتعرض على المنصات الرقمية، ولأن 70% من سكان العالم العربي تحت سن 25 سنه فهم بيشكلوا الشريحة الأكبر للمنصات دي وبتقدم لهم المحتوى المناسب من حيث الإيقاع ونوعية الموضوعات، لكنه أضاف إنه مع إقبال شريحة من الجمهور الأكبر سنًا على مشاهدة المنصات الرقمية دي، هيتم تعديل المحتوى الدرامي من القائمين عليها بهدف تقديم محتوى بيتناسب مع هذه الفئة العمرية.

وعن مدى تأثير كوفيد19 على الدراما في مصر، أوضح الجنايني أن الإنتاج الدرامي أختلف بعد الأزمة دي من حيث اختيار الموضوع المقدم وموافقته مع متطلبات واحتياجات المشاهد في الفترة دي، وذكر على سبيل المثال، إنه في شهر رمضان السنة اللي فاتت، الأعمال الكوميدية ماحققتش النجاح المتوقع مقارنه بالأعوام السابقة، وممكن ده يكون بيرجع لمعاناة المواطنين خلال أزمة كورونا على المستوى الصحي والنفسي، وبالتالي لاقينا السنة دي مافيش أعمال كوميدية خلال شهر رمضان، لأن صناع المحتوى شعروا أن الجمهور مش هيتقبل مشاهدة كوميديا وهو بيعيش في أزمة.

كمان أشار "الجنايني" أن عودة السينما هتكون قوية جدًاً، وهيعود رواد السينما ليها مرة تانية بعد فترة غياب، وإن فريق المتفائلين وهو واحد منهم بيتوقع أنه مع شهور الصيف تعود الأمور لطبيعتها.

الحلقة دي من حوارات "صوت مصر- تغيير الواقع" Narrative Summit- Reshaping Norms لعام 2021، ضمن الحوارات المهمة اللي بتستضيفها قمة "صوت مصر" منذ السنة اللي فاتت على منصات التواصل الاجتماعي الخاصة بها، لمناقشة الخبراء والمتخصصين في القضايا المختلفة، وركزت السنة دي أنها تكون دعوة للتفاؤل، وده بعد النجاح الكبير اللي حققته الحوارات خلال عام 2020، واللي ظهر من خلال المتابعات والوصول للحلقات اللي وصل لـ 11 مليون مستخدم، كمان بلغت المشاهدات 4.5 مليون مشاهدة و3.5 مليون تفاعل على مواقع التواصل الاجتماعي المختلفة.