تقدر تسافر وتلف أوروبا لمدة أسبوع من غير فلوس، أو سوشيال ميديا، والعملة الوحيدة اللي بتتعامل بيها هي عبوات ريد بل؟
مستغرب؟ طب ركز في اللي جي..
أعزائنا المغامرين من كل مكان.. ده تحدي Red Bull – Can You Make It? (RBCYMI).
ريد بل كل سنتين بتعمل تحدي لطلاب الجامعات من كل بلاد العالم. فيه بيتم اختيار فريق واحد من كل بلد. الفرق بتسافر أوروبا لمدة أسبوع. وبتكون كل تعاملاتهم خلال السفر بعبوات ريد بل، كبديل للفلوس. يعني مطلوب منهم يستخدموها للإقامة، الانتقالات، الأكل، الفسح.. إلخ.
إيه التحدي بالتفصيل؟
ريد بل هتسفّر كل فريق مُكون من 3 أفراد، لواحدة من 5 نقط الانطلاق في أوروبا (برشلونة – ميلان – كوبنهاجن – أمستردام – بودابست). خلال السفر ممنوع استخدام الفلوس، الكريدت كارد، أو الموبايلات. وهيتم تسليم كل فريق 24 عبوة ريد بل، يستخدمها كبديل للفلوس زي ما وضحنا فوق.
كل الفرق هتنطلق في نفس الوقت بالظبط، يوم 21 أبريل. وقدامهم أسبوع علشان يوصلوا برلين، يوم 28 أبريل. وخلال أسبوع التحدي كل فريق بيعدي على محطات ريد بل المختلفة، علشان ياخد عبوات ريد بل تانية، وكمان يعرف التحدي الجديد بتاعه.
إزاي تجمع النقط؟
صحيح دي مش مسابقة، قد ما هي مغامرة ماتتنسيش طول العمر، لكن برضو في النهاية هيتم اختيار فائز. والفائز لازم يكون مجمع أكبر عدد من النقط. وده هيكون عن طريق: تنفيذ تحديات كل محطة – دعم المتابعين على السوشيا ميديا – جودة المحتوى اللي بيقدمه.
مش كده وبس، في ليست بأكتر من تحدي لازم الفرق تنفذها. منها سكاي دايفينج، سكيتنج، وحتى ألعاب الملاهي.
كل ده هتقدر الفرق تسجله وتنشره لايف، من خلال موبايلات خاصة من ريد بل. الموبايلات دي هتسمح بنشر المحتوى فقط من خلال موقع ريدل بل الرسمي. اللي هيكون المنصة الوحيدة اللي تقدر الناس تتابع من خلالها كل الفرق. والتفاعل مع كل فريق، هيزود النقط الخاصة بتاعته.
إزاي تشترك؟
طبعًا لازم تكون طالب جامعة، عمرك مايقلش عن 18 سنة. ولازم يكون عندك إنستجرام. هتختار اتنين من أصحابك اللي غاويين سفر ومغامرات زيك. بعد كده اعملوا فيديو مدته دقيقة واحدة، بتحاولوا فيه تقنعوا ريد بل إنها تختاركم للمشاركة في التحدي.
خليكوا فاكرين، فريق واحد بيمثل مصر هو اللي هينافس فرق من بلاد تانية. فاختاروا أحسن فكرة، صوروا الفيديو، حطوه على يوتيوب أو فيمو. واتأكدوا إنه بابليك علشان الشير.
آخر ميعاد للتقديم 17 فبراير، والتصويت هيبدأ يوم 18 ويستمر لحد يوم 24. اضغط هنا علشان تلحق تشترك.
