البنات يعشقوا التفاصيل والأوفر ثينكيج ساحلهم - إلا من رحم ربي - وبالتالي ده بيظهر على معظم تصرفاتهم. جزء من التصرفات دي خاص بالسوشيال ميديا. تعليقات غريبة بتتكتب، بلوكات أغرب بتتعمل، وغيرها. تعالوا نشوف نبذة من تصرفات "بعض" البنات على السوشيال ميديا:
كابشن بيان صحفي على أي صورة
ليه البنت لما تحط صورة للبروفايل وهي بتضحك مثلًا، تكتب معاها كابشن 6 أو 7 سطور مليانين عمق؟ ليه بقى؟ هه ليه؟ يا جماعة دي صورة عادية. مش لازم يكون معاها كابشن بيتكلم عن قوة المرأة في المجتمع، وتأثير ضحكتها على الاقتصاد. وإزاي الضحكة دي جاية من الأمعاء الغليظة للمعاناة في الحياة. بالراحة يا خوانا مش كده.
كومنت الرسالة المسجلة
صحبتها قلعت الحجاب.."بجد انتى كده أحلى وزي القمر". صحبتها لبست الحجاب.."بجد انتى كده أحلى وزي القمر". أي اتنين من صحابها اتخطبوا.. "انتوا أحلى كابل في الدنيا".
طب فهمينا امتى صحبتك بتبقى مش قمر؟ أو أي كابل عندك مش أحلى كابل؟ أو كابل عادي حتى. إيه مقاييس الحاجات الوحشة عندك طالما كله حلو كده؟
بلوك الخطوبة
لسه العلماء ماقدروش يفسروا لحد دلوقتي، سبب البلوك اللي بيترزع في وشك أول ما البنت بتتخطب. لكن اجتهادات بعض الشباب توصلت إلى إن السبب ممكن يكون، إنك كنت عريس محتمل، ولما جه العريس الأكيد كان لازم انت تختفي. أو ممكن تكون انت قربان بيتقدم للعريس، كدليل على الحب والإخلاص. وده بالفعل بيفسر إلغاء البلوك بعد الفركشة.
انت السند والضهر.. انت حب العمر
مرحلة الخطوبة عند بنات معينة بتكون مميزة، وفيها بيحسوا إنهم حققوا إنجاز بشري عجز عنه الملايين. ولازم تكتب على صورة الخطوبة انت السند والضهر وحب العمر وعمري اللي جي واللي راح.. إلخ. سند إيه وضهر مين وحب عمر إزاي؟ وانتى لسه عارفاه من شهر ونص؟ وكلها شهر وتفركشوا مش حوار يعني.
فيسبوك للالتزام وإنستجرام للشخلعة
إيه الفكرة إن البنت بتبقى محجبة على فيسبوك، ومن غير حجاب على إنستجرام؟ طب إيه الفكرة إن صورة فستان السهرة يتعمله كروب على فيسبوك، بس على إنستجرام ينزل كامل؟ طب إيه الفكرة في أي حاجة أصلًا؟ تعبتونا معاكوا.
بروفايل المشاهير
البنات بتفرح أوي لما يتقالها انتي شبه الممثلة الفلانية. الموضوع ده بيسبطهم جدًا، وتلاقي صور الفنانة دي مغرقة بروفايلها. اللي هو هتقتنع يعني هتقتنع. ويا سلام لو الممثلة دي تركية أو هندية، دي ممكن تكتب اسم الممثلة جنب اسمها على البروفايل. من حقها تفرح بشبابها برضو ياجماعة.
اللي عنده أي تفسير يا جماعة، يشاركنا به في الكومنتات.
