شبح الثلاثين دايمًا بيطارد بعض البنات، وده لإنه ارتبط بضغوط معينة فرضتها ثقافة قديمة، زي الجواز طبعًا. وإلا يكون فيها حاجة غلط. الحقيقة إن البنت حلوة في كل سن وبأي حال. وهي دي بالظبط فكرة جروب "Over Thirty" على فيس بوك.
فيروز الجندي مؤسسة الجروب قالت لـ "كلام القاهرة" إن الهدف منه الدعم النفسي للبنات. وإننا نشتغل علي وعيها بذاتها، ونقدم لها فرص تساعدها تطور من نفسها، وتعيش حياة أحسن وأفضل.
الجروب مش تقليدي يعني مش بينشر بوستات عشوائية أو بيقبل أي ريكوست. بالعكس النظام هو شعار أعضائه، وده بعد قبولهم الالتزام بشروط الاشتراك. ومقسمين أيام الأسبوع لأنشطة معينة حسب جدول محدد. وهي كالتالي:
يعني يوم السبت بوست نجاح وكفاح، من خلال قصص نجاح لبنات كتير بعد الثلاثين وقدرت تعدي بيها. الأحد يوم الشغل والوظايف، بيكون فيه فرص شغل لكل البنات وفي نفس الوقت اللي محتاجة شغل بتعرض مؤهلاتها.
الاتنين يوم الصحة والجمال، دكاترة في مجالات البشرة والشعر بيردو علي أسئلة البنات. بالإضافة للفاشون بلوجرز اللي بيساعدوهم في اختيار ملابسهم. الثلاثاء يوم العقل والحكمة، بيبقى موجود لايف كوتشز بيعملوا محاضرات للبنات عن طريق البوستات أو لايف.
الأربعاء يوم الكرش، وله نوعين من البوستات: الأول هي تكات كل ست في طبخاتها، وأحسن طبق بتقدمه وطريقة عمله. والنوع الثاني بيكون مع حد مختص في التغذية، بيديهم معلومات خاصة بالتغذية السليمة وأنواع الدايت الصحية المختلفة.
الخميس يوم العريس، وبرضو له نوعين من البوستات: الأول بيبقى لو حد عنده عريس أو عروسة مناسبين بيكتبوا مواصفاتهم، والمهتمين يتواصلوا معاهم. والنوع الثاني من البوستات خاص بالتوعية الجنسية، اللي كل البنات بتبقى محتجاها في الفترة دي.
الجمعة يوم الكتب، وده بيناقش أهم وأفضل الكتب. وبيبقى الجروب مفتوح لأي بنت حابة تتكلم عن الكتاب، أو تكتب عنه مقالات أو تلخصه. ده غير الجزء بتاع الفضفضة، اللي بيبقى طول الأيام. البنات بتفضفض فيه وتعرض مشاكلها، وبتلاقي المساعدة من غير ما يعرفوا هويتها. ولو محتاجة حد متخصص الجروب بيوصلها بيه مجانًا أو بأجر رمزي.
