النهارده جوجل بيحتفل بالذكرى الـ 141 لميلاد المناضلة هدى شعراي. واللي اتعرفت بالدفاع عن حقوق المرأة، وكانت رائدة النهضة النسائية. ده غير إن كان لها دور كبير في مناهضة الاستعمار البريطاني في مصر. وبالمناسبة دي تعالوا نتعرف أكتر على هدى شعراوي:

1- اسمها بالكامل نور الهدى محمد سلطان شعراوي، اتولدت في 23 يونيو سنة 1879، محافظة المنيا. والدها محمد سلطان باشا، رئيس المجلس النيابي الأول في مصر في عهد الخديوي توفيق.

2- حفظت القرآن الكريم وهي بعمر 9 سنين، واتعلمت اللغة التركية والعربية والفرنسية، والبيانو والخط في البيت.

3- عانت هدى شعراوي من التفرقة الجنسية بينها وبين أخوها. كانت العيلة بتعامله بطريقة خاصة، مع إنها أكبر منه بحوالي 10 سنين. الأمر اللي أثر على شخصيتها وأسلوب تفكيرها. وكمان سفرها لأوروبا، وانبهارها بامتيازات المرأة الأوروبية.

4- اتجوزت ابن عمها "علي باشا شعراوي" بعد وفاة والدها، اللي تولى الوصية عليها رغم رفضها. لكن ده كان في سبيل التخلص من تفضيل أخوها عليها في المعاملة.

5- أسست "لجنة الوفد المركزية للسيدات"، وفي 1907 أسست جمعية لرعاية الأطفال. وقادت مظاهرات السيدات سنة 1919.

6- أقنعت مسؤولي الجامعة المصرية بتخصيص قاعة للمحاضرات النسوية سنة 1908. 

7- سنة 1921 وخلال استقبال المصريين لسعد زغلول، خلعت هدى شعراوي النقاب وداست عليه برجلها. وساعتها لقت دعم كبير من حشود النساء الموجودين.

8- دعت شعراوي لرفع سن زواج الفتيات لـ 16 سنة كحد أدنى، والذكور 18 سنة. وطالبت بوضع قيود للرجل تمنعه من الطلاق من طرف واحد، وعملت مظاهرة ضد تعدد الزوجات. كمكان أيدت تعليم المرأة وعملها المهني والسياسي.

9- حصلت هدى شعراوي على أوسمة ونياشين من الدولة المصرية. واتوفت في 12 ديسمبر 1947. وأُطلِق اسمها على مؤسسات ومدارس وشوارع في مدن مصرية كتيرة، تكريم لها بعد وفاتها.