النهارده الخميس، هينطلق مهرجان الجونة السينمائي الدولي في دورته الـ 5، بحضور نجوم الفن وصناع السينما من مصر ودول العالم.
السنة دي بداية المهرجان كانت مختلفة شوية، حصلت أحداث كتير غير متوقعة خالص، هتكون علامة مميزة للدورة دي:
حريق الجونة
مع بدء وصول مدعوين المهرجان لـ مدينة الجونة، وقع حريق هائل في قاعة المؤتمرات، وبدأت تنتشر صور فيديوهات من مكان الحريق، وماحدش كان عارف الحريق ده سببه إيه.
تصريحات سميح ساويرس: "المهرجان في معاده .. وكأن ماحصلش حاجة".
بسرعة خرج المهندس سميح ساويرس من قلب الحريق، وقال إن السبب ماس كهربائي حصل في ساحة مسرح البلازا، وتمت السيطرة عليه وبكره كل الحضور هيحسوا كأن مافيش حاجه حصلت.
اعتذار انتشال ليسرا
في الأيام اللي سبقت المهرجان، صرح انتشال التميمى، مدير مهرجان الجونة السينمائي، وقال المهرجان مش هاينفع يكرم يسرا لأنها عضو باللجنة الاستشارية، الكلام ده أزعج يسرا جدًا، واتسبب في توتر العلاقات بين القائمين على المهرجان وبين يسرا.
انتهي سوء التفاهم ده، بعد اعتذار انتشال في المؤتمر الصحفي اللي تم عقد إمبارح، وقال :" أعتذر عن أي إزعاج تسببت فيه، لم أقصد أزعجها القصد الأساسي أنها ليست فقط أهم الفنانات ولكنها مؤثرة على أكثر من جيل"، وقام حضنها ويسرا قبلت اعتذاره.
أسئلة محرجة لإدارة المهرجان
رد المهندس نجيب ساويرس على أقاويل إن مهرجان الجونة مهرجان للفساتين الحلوة بس، وقال: "اللى بيقولوا كدا قاعدين فى البيت وبيشوفوا مشاهد بس، المهرجان للأفلام العالمية والجوائز المهمة".
وكمان نفي سميح ساويرس إن المهرجان بيدفع فلوس للفنانين علشان يحضروا، وقال:"نضجنا كفاية، والسنة دي مادفعناش ولا مليم، والسنين اللي فات النجوم العالميين حضروا من غير فلوس، ومستمرين في ده لحد ما يوصل إننا نبقى مهرجان جذاب، الناس تطلب تحضره من نفسها".
إدارة واحتواء الأزمة بنجاح
في وقت قياسي، نجح فريق الترميم في شركة "أوراسكوم" في إصلاح منطقة البلازا في أقل من 12 ساعة، وكل حاجة رجعت لطبيعتها وجمالها الأصلي بشكل أبهر كل اللي شاف الحريق قبل وبعد.
استنوا تغطية حصرية لكل أحداث المهرجان على كلام القاهرة
خاص.. دينا الشربيني هتغني في كليب "فلتت مني" لـ حسن أبو الروس
