للأسف هوس الشهرة والتريند مسيطر بجنون على بعض مشاهير السوشيل ميديا في مصر، ومابقتش حاجه غريبة خالص إننا نشوف محتوى مالوش أي قيمة ولا هدف، وبيحقق نسبة مشاركة مهولة بين المستخدمين على السوشيل ميديا، ده غير الفيديوهات المصطنعة اللي بيكون الهدف منها هو تحقيق تفاعل وبس..

وأحدث الفيديوهات اللي اتحولت لتريند مؤخرًا هو الفيديو اللي نشرته صفحة "رشا وحماتها فريولا" على فيسبوك، واللي ظهر خلاله الشخصيتين أصحاب الصفحة، وهما بيتخانقوا على مين فيهم ترجع بعربيتها علشان الطريق يمشي، وطبعًا الموقف ضحك ناس كتير، خاصة إنه بيرسخ للصورة النمطية المبالغ فيها واللي بتقول إن الستات مابتعرفش تسوق أو تركن.

في البداية كان الكل فاكر إنه موقف حقيقي، لدرجة إن المارة في الشارع، اتدخلوا وبدأوا يقنعوهم بهدوء، وبالفعل كل واحدة رجعت عربيتها، والموضوع اتلم بطريقة كوميدية.

بعد انتشار الفيديو على السوشيل ميديا والتأكد إنه مش موقف حقيقي، الناس انقسمت لفريقين ما بين مؤيد إنه عادي مجرد هزار، والفريق التاني معارض لفكرة نشر أي حاجه والاستخفاف بعقول الناس علشان التريند، خاصة إن الفيديو حقق ملايين المشاهدات.

وعلى ذكر السوشيل ميديا، من ساعات أصدرت مصلحة الضرائب، قرار بيلزم المشاهير الناشطين على مواقع التواصل الاجتماعي، بفتح سجلات ضريبية، لكل ممن تخطت أرباحه الـ500 ألف جنيه سنويًا.

ياترى بعد القرار ده هنشوف فيديوهات غريبة تاني على السوشيل ميديا ولا الظاهرة دي هتختفي.