تقريبًا كده معظم الشباب أو الرجالة بشكل عام، عدوا على مرحلة السؤال اللي يحير الملايين مالك ياحبيبتي؟ وكان الرد عليه "مفيش.. ماليش". مع شوية ريأكشنات بتزود ضربات القلب. في الحقيقة إن البنت علشان توصل لمرحلة الغموض دي، بتكون فقدت الأمل في إن شريكها يعرف مالها لوحده. فبترجع خطوة لورا جايز يفهم، تعالوا نعرف أسباب "مفيش" عند البنات:

- التواريخ المهمة

أوقات كتير بعض الرجالة عشان مانعممش، بيسقطوا التواريخ المهمة في العلاقة. يعني أول مرة اتعرف فيها على حبيبته، أول مرة قالها كلمة بحبك. ولإن البنات مشاعرها مشتعلة بزيادة، غالبًا هتكون كاتبة تواريخ أول مرة في كل حاجة حصلت مابينهم. ومستنيه يعدي عليها سنة علشان بيحتفلوا بيها. ولما مش بتلاقي نفس الاهتمام بالإيفينتس دي، بتقفش مع نفسها وتعلق على مفيش.

- لوك جديد

لون شعر جديد أو قصة على الموضة، ساعات مابتلفتش انتباه الراجل أوي. مهما حاولت البنت إنها تلمح له مبياخدش باله. لإن الرجالة بتفكر بشكل عملي أكتر ومخمهم مبيهتمش بالتفاصيل. وقتها هتبدأ تشك في حبه ليها، وطبعا هيكون الرد بعد البوز إياه بـ"مفيش".

- مش لاقية حاجة ألبسها

لو انت متجوز فلازم تسلم بحاجتين: أولها معندهاش دولاب يكفي هدومها، أما الثانية إنها قبل كل خروجة معندهاش لبس تلبسه. أكيد لاحظت التناقض يامعلم، يعني راجع نفسك كده وفاجأها بفستان جديد. علشان تعرف مالها وتعرف تنام مرتاح.

- خليك Big Fan

 على قد ما البنات مابتحبش الولد اللي بيخنقها اهتمام، على قد ما بتفرح لما تلاقي حبيبها مهتم بأكونتاتها على السوشيال ميديا. يعني على قد ما تقدر اهريها لايكس  وريأكشن لاف، هتلاقيها راضية عليك.

- أهو كده وخلاص

ممكن تعمل كل ده ومتأكد إنك في الأمان، وبرضو تسألها مالك؟ تقولك مفيش. اتطمن غالبًا هتكون متضايقة إن ضفرها اللي بتربيه من شهر، اتكسر. وعايزاك تتحايل عليها شوية علشان تحس إنك واقف جنبها في أزمتها.