الشعب المصري يعز الأكل وسيرة الأكل، إحنا تقريبًا الشعب الوحيد، اللي عنده مناسبات كتيرة مرتبطة بأكلات معينة. اللطيف كمان إن قاموس الكلام ما بين الناس برضو مليان أكل. والأكلات دي بتعبر عن حاجات، مستحيل حد يفهمها غيرنا. تعالوا نبص بصة.

- ملبن

عنوان المعاكسة الأول في الشارع المصري. وساعات بيكون وصف للبنات الكيرفي المليانة حبيتن. وده من شدة حلاوة البنت وأنوثتها.

- الشاي

دي الحاجة اللي بتجامل بيها شخص بعينه، علشان يخلص لك مصلحتك. الشاي ده ممكن يبقى علبة سجاير، غدوة حلوة، 20 جنيه، أي حاجة.

- قشطة

أي اتفاق بيتم بين اتنين، لازم يتأكد بكلمة "قشطة". دي زي ختم النسر كده بس للكلام.

- كوسة

ودي مفيش أكتر منها في بلدنا الحبيبة. وكلنا جربناها بشكل أو بآخر، سواء كنا الضحية أو كنا المنتصر. ومش محتاجة توضيح لأنها زي الشمس، دي هي الشمس.

- بتنجان - بلح - في الكنافة

بيتقالوا من باب السخرية والهزار على الشخص اللي مش مسؤل عن تصرفاته. مش فاهم أي حاجة في أي حاجة، وأفعاله غريبة، وبتغرقه وتغرق اللي حواليه في الآخر.

- رأس كرنبة

لما يكون الشخص مكبر دماغه من الحياة. يعني وجودده زي عدمه في أي خروجة أو قعدة.

- سمك لبن تمر هندي

لما العشوائية هي اللي تحكم، ونبدأ نخلط حاجات كتير مالهاش علاقة ببعض في أي موضوع، ساعتها ده بيكون مبدأ سمك لبن تمر هندي.

قولوا لنا إيه تاني من الأكلات بتستخدموه في كلامكم كل يوم؟