أكثر من 15 مليون حرصوا على متابعة نجم ليفربول اللاعب المصري محمد صلاح على حسابه بموقع “تويتر"، ملايين الأشخاص حول العالم جمعهم الشغف بمعرفة تدويناته وأفكاره أول بأول.

أما حساب "مو صلاح" نفسه، فبيتابع حوالي 148 شخص بس، ومن خلال متابعتنا لاقينا إن الرقم ده ثابت بقاله فترة كبيرة، يمكن ده بيثبت إن مافيش حد لفت انتباه "صلاح" طول الفترة اللي فاتت عشان يتابعه وجايز يكون لأسباب تانية مانعرفهاش

. عمومًا الـ 148 دول بيتنوعوا ما بين حسابات لمشاهير في الفن والرياضة ورجال الدين والتنمية البشرية ورجل الأعمال والمليارديرات.

يلا نعرف أبرز 5 منهم:

رامز جلال

الفنان رامز جلال من ضمن الكوميديانات اللي بيتابعهم صلاح على تويتر، وده سبب جديد يخلينا نحب رامز رغم كل اللي بيعمله في صحابه.

رضوى الشربيني

كانت المفاجأة لما لاقينا "مو صلاح" عامل "فولو" للإعلامية رضوى الشربيني، وعندنا تفسيرات كتير للموضوع ده منها إنه بيدعم المرأة العربية في المشاكل اللي بتقابلها، ما هو أصل رجالة العالم كله تتعلم منه "الجنتلة" ياجماعة.

نجيب ساويرس

محمد صلاح مهتم بتويتات رجل الأعمال الملياردير نجيب ساويرس، والحقيقة إن نجيب نشيط جدًا على تويتر، وبيكتب تدوينات طول الوقت عن أي حاجه بتحصل حوالينا.

مصطفى حسني

صفحات دينية ومشايخ مصريين وعرب، بينجذب لآرائهم صلاح، والداعية الإسلامي مصطفى حسني أهمهم بالنسبة لمحمد صلاح، وعلى فكرة علاقتهم مش بس على السوشيل ميديا، لكن من وقت للتاني بيتقابلوا وشوفنا ده في صور كتير بتجمعهم بره مصر.

أنغام

واضح إن أغاني المطربة أنغام بتناسب ذوق "فخر العرب"، لإنه اختار متابعتها من بين فنانات ومطربات كتير في الوطن العربي.