من حوالي أسبوع، أعلنت الفنانة إلهام شاهين تبرعها بكل أعضائها لو سليمة، بعد وفاتها لصالح المرضى علشان يستفادوا منها، وده بعد رجوعها للمتخصصين في الأمر ده، ودعت كمان لإنشاء بنك للأعضاء البشرية.

بعض مشاهير الوسط الفني رحبوا بالفكرة، وأعلنوا تبرعهم بأعضائهم هما كمان، يالا نعرف مين هما:

"لو كان حلال، هاوصي عيلتي بالتبرع بأعضائي للغلابة، اللي محتاجينها في عمليات زراعة قلب أو كبد أو قرنية وغيرها، وبتمنى التبرع ده يكون في ميزان حسناتي"، ده كان رد الراقصة دينا على سؤالها عن إمكانية التبرع بأعضائها أو لا.

أكدت إنها مؤيدة جدًا للفكرة، وكشفت إن تبرعها بأعضائها دي أول حاجه كتباها في وصيتها من 10 سنين أصلًا.

أعلن المنتج محمد العدل، تبرعه بأعضائه بعد وفاته، وأشار إنه بيتمنى يكون موجود في بطاقة الرقم القومي، خانة بتفيد التبرع من عدمه.

دعمت الفنانة انتصار الفكرة، وقالت: "إن التبرع بالأعضاء بعد الوفاة هيفيد الإنسانية والبشرية"، وأضافت إنها معندهاش مانع تتبرع بأعضائها بعد وفاتها وهتكتب ده في وصيتها.

كمان الراقصة لوسي، دعمت التبرع بالأعضاء، وأكدت على تبرعها بعد معرفة رأي كبار رجال الدين في الدولة، وشافت كمان إنها صدقة جارية وثواب كبير.