دلوقتي "فيسبوك" بقى من أهم التطبيقات، اللي مبيعديش يوم من غير ندخل عليها. كل واحد وأسبابه، في اللي بيعرف أخبار الدنيا حواليه، اللي داخل يتسلى مع صحابه ويزق اليوم، أو اللي بيشقط.. ماتستغربش بتحصل عادي. وخلال الوقت اللي بنقضيه من يومنا على فيسبوك، بنقابل حاجات بتضايقنا، وبتخلي التطبيق مزعج شويتين. تعالوا نعرفها مع بعض:

1- لما تكتب بوست مهم وماحدش يعملك لايك

ساعات كتير بتبقى عامل مجهود، وكاتب بوست شايفه من وجهه نظرك يهم أصدقائك وهيتفاعلوا معاه. بس اللي بيحصل العكس خالص، مبتلاقيش لايك واحدة تستر نفسك بيها. مع إنك بتجامل الكل، لايك هنا وكومنت هناك.

2- اللي بتلقح عليه هو اللي يعمل لايك

وارد يكون في خلاف، بينك وبين حد من أصدقاء فيسبوك. ولإنك مش بتعرف تقول رأيك بصراحة في كل المواقف، فبتوجه له كل كلامك في بوست وتنزله. المفاجأة اللي تحرق الدم بقى، إن هو نفس ذات الشخص بيعملك لايك عادي.

3- كومنتات القرايب

في عز ما انت راسم نفسك على فيسبوك، وخاربها ستوريز وصور وخروجات. تلاقي كومنت جايلك من حد قريبك، بيحكي مثلًا موقف سخيف ليك وانت صغير. ومش بعيد يكتب أسخف اسم انت مشهور بيه في العيلة. ساعتها بتحس إن كل حاجه باظت خالص.

4- لما تحط ستوري لحد وكله هيشوفها ماعدا هو

أحيانًا بنحط صور وفيديوهات أو نكتب quotes في الاستوريز، قاصدين حد معين يشوفها. الصدمة بقى لو عدت الـ 24 ساعة المسموح بيهم ومافتحهاش.

5- متبرع اللايكات

ده تحسه فاتح صفحتك ليل نهار، بمجرد ما تنزل بوست ولا صورة، يرزعك لايك. مع إنه شئ لطيف، بس مابيكونش أحسن حاجه بالنسبة للبنات. لإن الشخص ده بيشكك الناس إن في حاجه ما بينكوا.

6- لما تفتح ستوري حد قافش معاه

وانت قافش مع حد عندك على فيسبوك، بتبقى حريص أوي ماتعملوش لايكات ولا كومنتات. قال يعني بتعاقبه وكده. بس في لحظة بالغلط وانت بتقلب في استوريز صحابك، بتلاقي استوري الشخص ده اتفتحت قدامك. وطبعًا وقتها بيعرف إنك مراقبه ومتهم بيه.

7- اللي بيعملك منشن عمال على بطال

ده اللي فاضحك على الفضائيات، بالذات لو منشنك في بوست بيلقح على مديرك ولا صديق ما بينكوا. ده من النوادر لما تفتح الأكونت بتاعك ومتلاقيهوش عاملك 2، 3 منشن على الريق كده.

8- لما تكون بتتكلم في حاجه وتلاقيها ظهرتلك فجأة

كتير مننا لاحظ بعد الكلام على شخص معين أو موضوع أو حتى بعد لما بتيجي في بالك صورة معينة، بمجرد ما تفتح حسابك على فيسبوك تلاقيها. سواء في إعلانات أو اقتراحات لصفحات، أو منشورات لها علاقه بنفس موضوعك. وقتها بتحس إنك متراقب. وده سببه إن فيسبوك من أكتر التطبيقات اللي بتجمع معلومات عن مستخدميها، وبتطور من ده طول الوقت.

9- الهبد الكتير وصداع التريند

في ناس عندها هوس المشاركة في التريند، اللي هو لازم أكتبلي كلمتين في الموضوع الداير اليومين دول. ودول بيكونوا مزعجين للأشخاص اللي بيفضلوا عدم المشاركة. بيقعدوا يهبدوا ليل نهار ويصدعونا، مع إنه لو ماكتبوش مش هتحصل حاجه يعني. نهدى شويه يا جماعه مش كده.