الصورة لمتحف هيرميتاج، سان بطرسبرج، روسيا.

القعدة في البيت طوِلت ومعاها طبعًا بيزيد الملل. ده غير إن أزمة كورونا أجبرت أماكن ترفيهية كتير على الإغلاق، ومن ضمنها المتاحف في كل أنحاء العالم. لكن الخبر الحلو إن ده مش هيمنعك تزور كل متاحف العالم، وانت في بيتك على سريرك. لأن منصة Google Arts and Culture دلوقتي بتوفر جولات افتراضية، لعدد كبير من المتاحف حول العالم.

مشروع جوجل ده انطلق من حوالي 10 سنين، ومع الوقت بدأ يكبر ويضم عدد أكبر من المتاحف. ودلوقتي بيعرض آلاف الصور عالية الوضوح، لأكتر من 1200 متحف في كل مكان في العالم. بما فيها المتحف الوطني في لندن، متحف رينا صوفيا في مدريد، أو متحف هيرميتاج في سان بطرسبرج، روسيا.

طبعًا تقدر تزور كل المتاحف دي من جهاز الكمبيوتر بتاعك أو اللاب توب. لكن التجربة هتكون أفضل بكتير لما تحمل تطبيق المشروع مجانًا على موبايلك، لإنه بيعرضلك كل صورة مع كابشن توضيحي. بيشرح كل المعلومات عنها وبتعرف من خلال كل التفاصيل اللي محتاجها. 

متاح عرض المتاحف بالترتيب الأبجدي، وكمان تقدر تبحث على اسم متحف معين علشان تزور. تقدروا تدخلوا وتستمتعوا بكل المتاحف دي من هنا.