انتشر على السوشيال ميديا صورة لمطعم كبدة، معلق برواز لشخصية والد اللمبي اللي جسدها الفنان الكوميدي محمد سعد في فيلمه الشهير "اللمبي"، لحد هنا الموضوع لطيف، ما هو مش غريب على الشعب المصري، دايمًا يحب الضحك والفرفشة، لكن اللي لفت انتباهنا وزود تفاعل الناس مع الصورة، إن المطعم مش موجود في مصر أصلًا، ومكانه الحقيقي في مدينة اسطنبول بـ تركيا.

فقررنا في "كلام القاهرة" نبحث وراء الصورة دي، وفعًلا وصلنا لاصحاب المطعم، واتكلمنا مع واحد منهم اسمه "أبو بكر أحمد"، وقال لنا إنه شغال في مجال المطاعم بقاله حوالي 8 سنين، وكان نفسه يفتح مطعم خاص بيه من زمان، ومشي وراء طموحه، لحد ما فتح مطعم للأكل المصري الأصيل في تركيا وسماه "أفندينا".

قال كمان إن المطعم بيقدم أكلات بيحبها معظم المصريين، وموجودة في معظم شوارع مصر، وهي: "كبدة، سمين، حواوشي، سجق، سكلانس"، والسندويتشات عليها إقبال من جنسيات مختلفة، من المغرب وتركيا وسوريا والصين.

أما بقى عن سبب اختياره لـ صورة اللمبي اللي قلبت السوشيال ميديا علشان تزين مطعمه، فقال لنا إن الصورة دي بالتحديد ليها ذكريات مع مصريين كتير، وبتفكرنا بمشهد اللمبي لما كان بيتكلم مع والده المتوفي عن عربية الكبدة ودورها في تربيته بطريقة كوميدية، والأهم إني حبيت ارسم الضحكة على وش كل مصري يدخل المطعم، ومايحسش إنه لوحده في الغربة.