الدراسة بدأت وفي مننا اللي داخل على أهم حدث في حياته.. الجامعة. وده حدث لو تعلمون عظيم بالنسبة للطلبة، خصوصًا المستجدين اللي جايين من الثانوية العامة طازة. وعلشان كده قررنا نساعدهم، قبل ما يتحفل عليهم ويبقوا زي خلف الدهشوي في فيلم "صعيدي في الجامعة الأمريكية". زي ولادنا برضو. وإليكم أهم النصائح:

- اللبس يامعلم. عدم لبسك يونيفورم المدرسة تاني، مش معناه إنك تروج الجامعة ببدلة أو شورت مثلًا. خليك في المعقول وانت بتشتري لبس جديد. أما البنات لازم يعرفوا إنهم مش رايحين سهرة في الديسكو أو عيد ميلاد. يعني بلاش مكياج أوفر وبربرق الصبح.

- روح أول بالذات يوم بدري، وده علشان تعرف أماكن المدرجات وتسهل الطريق على نفسك في الأيام الجاية.

- اعتمد على نفسك وبلاش حد من أهلك يجي معاك، كفاية إنهم يوصلوك لباب الجامعة. عشان ده لو حصل هيبقى من ذكريات الماضي الأليم.

- لو كنت جاي من الأقاليم أو من محافظة بعيدة عن القاهرة، حاول تتأقلم مع الوضع وبلاش تعلق على كل حاجة هتشوفها. لإنك من الآخر هتشوف كتير.

- خليك على طبيعتك وعامل الناس كلها زي بعض، بلاش تكون "fake" عشان الناس تحبك. الفشخرة مش حلوة.

- انسى كلام المدرسة وركز بقى في كلام الجامعة. انت دلوقتي بتتعامل مع مصطلحات زي: دكتور والأسيستنت، محاضرة أو سكشن، مدرج. خلاص مفيش فصل ولا أستاذ ولا واجب.