مؤخرًا، "ويجز" كان ضيف الإعلامي الإماراتي أنس بوخش في برنامجه "ABtalks"، اللي بيبث على قناته على يوتيوب، اتفرجنا على الحلقة وعجبتنا جدًا، وشوفنا أحمد علي أو "ويجز" بشكل تاني خالص.
في السطور الجاية هنعرفكم على أبرز 27 تصريح إنساني لـ "ويجز" في الحلقة.
1 - بعيش دلوقتي مرحلة هدوء بعد العاصفة، أنا صاحب المعركة وبشوف إيه اللي ممكن يحصل بعد كده.
2 - شخصيتي مابتتغيرش على المسرح.
3 - ماقدرش أقول إن طفولتي كانت قاسية، لكني عشت حاجات مختلفة خلتني أكون الشخص الي أنا عليه دلوقتي.
4 - عشت أيام مكنش معايا غير 20 أو 50 جنيه بس، وكنت بتعايش بيهم عادي، فأنا لحد 100 جنيه في اليوم كويس.
5 - ماكنتش مخطط إني هغني خالص، ومرة واحدة بقيت في اللي أنا فيه دلوقتي، وأنا صغير كنت بحب اقرا وأكتب واسمع مزيكا وأروح اتفرج على الماتش مع أصحابي.
6 - علاقتي بوالدي ووالدتي وأنا صغير كانت زي العسل، عندي 6 أخوات وأخويا الصغير خالد عايش معايا، بس هو رافض يكون تحت مظلة "ويجز"، عنده عالم تاني، دماغنا مختلفة جدًا.
7 - اتنقلت كتير من منطقة لمنطقة ومن مدرسة للتانية، فمكنش عندي أصحاب مستمرين، كنت بضطر أصاحب ناس عارفين بعض أصلا من سنين، بس كنت طفل متكلم واجتماعي.
8- لما كبرت بقيت أناني شوية، ومابقتش استثمر في علاقات عارف إنها مش هتستمر كتير، عرفت كمان إني مش لازم أكون لازق في شخص معين وشه فوشي على طول.
9- عملت كل حاجه أهلي طلبوا مني معملهاش، علشان أجرب إحساسها، اتعلمت كمان ماحكمش على البشر يعملوا اللي هما عايزينه.
10- لما سافرت بره مصر، شوفت ناس طريقة تفكيرها مختلفة جدًا، حسيت إني كنت ظالم نفسي، أنا دلوقتي رقيب نفسي.
11- عندي طموحات وأهداف كتير، مش مستني من وراها حاجة، بس أحب أعملها وأجربها. بحب أعيش اللحظة اللي أنا فيها، وبخطط للأسبوع أو الشهر اللي إحنا فيه لإن ده اللي معايا.
12- أبويا كان بينشفها عليا أوي، فهمت إنه كان عايزني أشتغل، مش عايز أغير حاجة أهلي عملوها معايا في طفولتي، لإنها شكلت شخصيتي، يمكن كنت أتمنى يزورونا أكتر.
13 - حواليا ناس بتساعدني، أنا مش لوحدي، الحاجه اللي الكل بيتفق عليها بتتنفذ، ساعات بنشف دماغي وبعمل اللي أنا عايزة في الآخر، بس مقدرش أغير الخطة لو هتفيد لحد.
14- ماحبش حد يقلدني في حاجه غلط بعملها، علشان كده بحاول اتلاشي كل اللي بيحصل حواليا، وبعمل مزيكا شكلها حلو تليق بالناس اللي بتسمعني، واتبسط وأنا بعملها، وهو ده اللي بينجح.
15- أوقات بهرب من حفلات لما بيشغلوا الأغاني بتاعتي. علشان بقعد أحلل اليوم اللي كتبت فيه التراك ده، مش في كل الأوقات ببقى في الحالة اللي تسمحلي اسمعني.
16- علشان كده بقسم المجهود الذهني على كذا حد، وبكبر دماغي وعلى فكرة أنا مش بارد، لكني عادي.
17- ماحبش الشهرة، أنا اجتماعي آه بس أحب أنا اللي اتعرف على الناس محدش ييجي يتعرف عليا.
18- بحس إني عريس كل ليلة بعد كل حفلة، لما بشوف كل الناس دي بتغني معايا وبتدفعلي طاقة حب وحماس، كأنه فرحي اللي مليان ناس.
19- لوني المفضل الأزرق، لإنه أصفى لون، وعشان مرتبط معايا بالبحر والسماء وطفولتي في إسكندرية، بشوفهم لما أحب أفصل من اللي ورايا.
20- لو هتمنى أشوف صفة معينة في اللي حواليا هتكون النفاق، مجالنا مليان منافقين بس أنا عارفهم وماحدش بيعرف يضحك عليا، وماشي بمبدأ مديش لحد حاجة هو عايزها مني، علشان أشوف هو عارفني لشخصي أو لسبب.
21- مقدرش افتح رسالة فيها تاريخ وفاتي سيبها على الله.
22- عشت لحظات حلوة في حياتي كتير، منها لما أمي رجعت من الحج بعد 40 يوم ماشوفتهاش، ولما اشتريت أول موتوسيكل.
23- لو كنت شخص تاني، مكنتش هعرف أصاحب نفسي "ويجز"، موودي بيتغير كتير كل ربع ساعة، لدرجة إني قبل كل حفلة بقول مش عايز أطلع الحفلة دي.
24- مقدرش أجي على نفسي نص دقيقة عشان حد تاني.
25- أخر مرة عيطت لما حسيت بوحدة، من أسبوعين كده كل صحابي كانوا في حتة، ولاقيت نفسي مش معايا حد وفي البيت لوحدي.
26- نفسي أمي تحضرلي حفلة، أنا عارف إنها دوشة كتير عليها بس هي توافق بس وهقلب الدنيا.
27- لو قلبي هيقولي رسالة هتكون شكرًا، لإني مش ماليه سواد معنديش أي مشاكل.
