أعلن أعضاء غرفة الصناعات الغذائية المصرية، عن انخفاض بنسبة 30 لـ 40% في مبيعات الحلويات خلال شهر رمضان. مقارنة بالسنين اللي فاتت.
"فتحي دياب" أحد أعضاء الغرفة ومالك محل حلويات بالقاهرة الجديدة، قال إن استهلاك الحلويات انخفض بنسبة 40% السنة دي خلال رمضان، بالنسبة لرمضان السنة اللي فاتت.. حسب ما نشر "الأهرام".
شهر رمضان وإجازة عيد الفطر هم الموسم الرئيسي لبيع الحلويات. واللي بتشهد انخفاض ملحوظ على الطلب في محلات الحلويات. الحلويات الشرقية التقليدية زي الكنافة، البسبوسة، البقلاوة، والقطايف بيكونوا أساسيين خلال رمضان. أما الكحك فده اللي بيسيطر خلال فترة العيد.
وأرجع "دياب" الانخفاض ده للقيود اللي فرضها فيروس كورونا، بما فيها حظر التجوال اللي بيبدأ من 9 مساءً. وده قلل عدد المشترين. خاصة إن المعتاد في القاهرة إن المحلات بتفضل مفتوحة لبعد نص الليل.
أما "محمد الجمل"، عضو تاني في من أعضاء الغرفة، فقدّر نسبة التراجع في الطلب على الحلويات، ما بين 30 لـ 40%. وقال إن متوسط سعر الكيلو للحلويات من 60 لـ 90 جنيه.
مصر السنة دي بتشهد رمضان مختلف تمامًأ عن اللي سبقوه. وده طبعًا بسبب القيود اللي فرضها فيروس كورونا المستجد، بما فيها الحظر وقفل أماكن كتيرة من 21 مارس اللي فات.
ده طبعًا انعكس على أنشطة كتيرة خاصة برمضان، زي قفل المساجد اللي معاها مابقاش فيه صلاة تروايح. وكمان اتلغت كل موائد الرحمن، واقتصر الأمر على توصيل المساعدات للأهالي في البيوت.
وكلنا بندعي ربنا يعدي الأزمة دي على خير.
