مهما كان نوع شغلك، هتقابل شخصيات مابتتغيرش وموجودة في أي شغلانة. وهتتعامل معاها كل يوم. ده طبعًا بوجود العصفورة سيد الناس. صحيح فيهم الكويس والوحش، بس بشكل عام في سمات معينة بتميزهم، ولازم تلاقي منهم معاك في الشركة. تعالوا نتعرف عليهم:

1- المطبلاتي

طبعًا لازم يكون أول واحد. ده بتاع شلوت سعادتك دفعة للأمام يا ريس. يروح مدير ويبجي غيره، ويفضل المطبلاتي ثابت لا يتغير. تصقيف وتهليل على الفاضية والمليانة. ممكن تلاقيه بيمدح مديره على كحته اللي كلها علم وتوعية. هو مش قريب المدير ولا من معارفه، كل الحكاية إن التطبيل أسلوب حياة عنده.

2- مسئول الفطار

من اسمه، ده اللي بيجمع الأوردر ويتصل ويطلب ويحاسب، كله كله. لو حد جاع في بيته بعد الشغل، بيتصل بيه يسأله على الأكل. أي حد عايز يفطر بيروح له. ده بقى لو في يوم غاب أو جاب أكل معاه.. مجاعة وضربت في الشركة كلها.

3- الـ visitor

ده تحسه بييجي كل يوم زيارة كده، يفرفش مع الناس. وماحدش عارف هو بيشتغل إيه. قاعد مع دول شوية ومع دول شوية، نسكافيه مع ده وشاي مع دي. حاجة كده منتهى "أنا رايح النادي" خالص يعني.

4- الرايق صاحب المزاج

هتلاقيه بيدندن وهو قاعد حتى لو صوته مش حلو عادي. لازم يكون مشغل أغاني علشان يعرف يشتغل، أو مايشتغلش بقى مش فارقة. المهم مزاجه يتظبط. أغانيه شعبي أو كلاسيك، عربي أو إنجلش، انت وحظك. ده تاخد بعضك وتقعد جنبه لما تكون زهقان، هيديلك ليست أغاني عنب هتنسيك نفسك.

5- المتشائم

تحسه من جمهور الفنانة نيللي كريم، عم رضا بتاع "كله رايح". شايف الدنيا كلها سواد في سواد. عليه طاقة سلبية تتصدر لأوروبا. 5 دقايق معاه وتبدأ تقطع شرايينك، أو على الأقل تفكر في طريقة انتحار لطيفة للويك إند. 

6- صاحب السعادة

مش القائد أو الشخصية المهمة، لا إحنا نقصدها حرفيًا. ده الشخص اللي بينشر البهجة والسعادة في المكتب، علشان يقضي على روح المتشائم اللي فوق ده. ده اللي بيحلي طعم الأحزان ويعمل شعوذة في المكان. ادعي ربنا ده يكون موجود معاك في شغلك، علشان حرفيًا ده اللي هيصبرك على بلاوي كتير.

7- التلميذ النجيب

قلبه على الشغل بزيادة. عامل زي صاحبك أيام المدرسة، اللي كان يقول للمدرس "مش هتدينا واجب يا أستاذ؟". ده اللي بييجي من أول دقيقة وشه في شاشة الكمبيوتر، مش بيسيبها غير وهو قايم مروح. ده بعد ما يتحايلوا عليه علشان يروح.

8- المستعجل

عكس التلميذ النجيب، اللي من أول ما يوصل يسأل هنمشي إمتى. ده بالنسباله الشغل عقبة في حياته بتأخره عن إنجازات تانية مهمة. إنجازات ماحدش يعرفها غيره.

لو قابلتوا أنواع تانية شاركونا بيها في الكومنتات.