لاحظنا إن دراما رمضان السنة دي، معظمها جد وتوتر وعياط، والحتة الكوميدي مش حاضرة بشكل كبير، ورغم كده انفرد مسلسل "خلي بالك من زيزي" للفنانة أمينة خليل ومحمد ممدوح بجرعة كوميدية اجتماعية تفصلك من كل ده، والأهم كمان إنه بيناقش موضوع غير مسبوق في الدراما المصرية، وهو مرض "فرط الحركة" أو "ADHD" عند الأطفال، يالا نعرف أكتر عن المرض ده:

1- في الحلقة 12، شوفنا مشهد بيوعي الأمهات والأباء بمرض فرط الحركة، وإزاي يتعاملوا مع أطفالهم المصابين به بطريقة سليمة، وده خلال زيارة الفنانة أسماء جلال "هدى" وزوجها الفنان علي الطيب "وليد" لدكتورة أمراض نفسية، واللي بتشرح لهم حالة طفلتهم "تيتو"، وتكشف لهم إنها بتعاني من فرط حركة، وهو المرض اللي الأهل كان فاكرينه "شقاوة" وكانوا فاكرين كمان إن الأطفال المصابين بيه لما يكبروا هيكونوا أهدى، لكن ده مش حقيقي لإنه ده مرض بيحتاج تدخل علاجي سريع.

2- أعراض المرض المنتشرة بين بعض الأطفال بتتمثل في حركة مفرطة وسريعة، وتشتت وعدم تركيز رغم ارتفاع معدل الذكاء عندهم، وكمان ياخدوا قرارات متسرعة، والمرض ده بيظهر بين الأطفال في سن 3 أو 4 سنوات، خاصة الأولاد.

3- الأعراض دي بتختفي تمامًا، لما بيخضع الأطفال لـ كورس علاجي مناسب بيشمل تنمية المهارات في سن الـ 14 سنة.

4- نسبة الشفاء منه بتعدي الـ 85%، من خلال أدوية طبية متفق عليها عالميًا، ودي بتنشط القشرة المخية.

5- بعض الحالات بيستمر المرض معها لسن كبير، والأعراض زي الحركة السريعة وعدم القدرة على السيطرة على الانفعالات والتصرفات، بتسبب لهم إحراج قدام الناس في المواقف المختلفة.

تحية لصناع "خلي بالك من زيزي" اللي فكروا في مناقشة قضية مهمة زي دي.