في لمح البصر عدى أسبوع من رمضان، أسبوع كان مليان تريندات على السوشيال ميديا. كلها كانت عن المسلسلات والإعلانات والبرامج، اللي بنشوفها في التليفزيون. منها الغريب واللي بيضحك واللي مش مفهوم... فتعالوا نشوف مع بعض تريندات أول أسبوع رمضان:
إعلان قطونيل - ميس حمدان
الإعلان من أول ما تم عرضه، والناس مابقتش فاهمة هو فيه إيه. إعلان غريب كله علامات استفهام، لدرجة إن الشركة أصدرت قرار بمنع بثه احترامًا للذوق العام. كتر خيرهم الحقيقة.
أحمد العوضي
من أول مشهد له في مسلسل "الاختيار"، وحملة هجوم كوميدية انطلقت ضد الفنان أحمد العوضي. بسبب شخصية الضابط هشام العشماوي اللي بيلعبها في المسلسل.
سر حب ياسمين صبري لأبو هشيمة
طبعًا من ساعة خبر ارتباط ياسمين صبري برجل الأعمال أحمد أبو هشيمة، والكل مهتم بتفاصيل حياتهم. ولما ظهرت ياسمين في برنامج "رامز مجنون رسمي"، سألها رامز عن سبب حبها لزوجها. وكان ردها إنه بيضحكها.
طريقة عمل يوسف الشريف في البيت
باختصار كده، "سهر الصايغ" من حبها في "يوسف الشريف" في مسلسل "النهاية"، عملت منه نسخة إنسان آلى شبهه بالظبط بكل الصفات اللي عايزاها فيه. بس كده
دينا الشربيني اختارت اسم "رقية" على اسم والدة عمرو دياب
الفنانة دينا الشربيني كشفت إن السر ورا اختيار اسم "رقية" لشخصيتها في مسلسل "لعبة النسيان"، إنه اسم والدة عمرو دياب. اللي حبتها لإنها سمعت عنها كلام يجنن.
حب معلول للأهلي أقوى من خوفه من التعبان
في برنامج "رامز مجنون رسمي"، رامز هدد اللاعب التونسي علي معلول إنه هيجبره يمضي للزمالك، أو يطلع له التعبان من الصندوق. فرد عليه معلول "لا هات التعبان أحسن".
بهاء سلطان وحسين الجسمي
زي كل سنة، شركات الاتصالات والمؤسسات بيعملوا إعلانات رمضان الغنائية بأصوات فنانين كبار. والسنة من الأصوات اللي لفتت الانتبا، كان صوت الفنان بهاء سلطان في أغنية "انت استثنائي". اللي بيرجع بعد غياب فترة طويلة. وكمان صوت الفنان حسين الجسمي في أغنية "سنة الحياة".
كوتشي أمينة خليل أبو 13 ألف جنيه
الدنيا اتقلبت بعد حلقة أمينة خليل في "رامز مجنون رسمي"، لما الناس عرفت إن الكوتشي اللي طلبت منه يقلعه لها علشان غالي عليها، طلع ماركة Golden Goose. وسعره 863 دولار، يعني يا دوب 13 ألف جنيه مصري.
أغنية "اللي قادرة" - أمال ماهر
طرحت الفنانة آمال ماهر، من خلال قناتها على يوتيوب أغنية "اللي قادرة". من تتر مسلسل "ليه لأ" بطولة أمينة خليل. في الكليب بتظهر أمينة خليلة يوم كتب كتابها، وفجأة بتتخيل شكل حياتها الزوجية، اللي هتكون تنضيف وكنس وخنقة وتعب. فبتسيب كتب الكتاب وتهرب علسان تبقى حرة. بس.
نيللي كريم بقت فرفوشة عادي
غالبًا السنة دي الفنانة نيللي كريم معمول لها عمل، لأنها عاملة المسلسل الكوميدي "بـ 100 وش" مع الفنان آسر ياسين. لا وكمان بتغني شعبي.
منع رامز جلال من الظهور الإعلامي
بسبب برنامج "رامز مجنون رسمي"، قرر الدكتور طارق سعدة نقيب الإعلاميين، منع ظهور رامز جلال في جميع وسائل الإعلام المصرية. لكن شبكة قنوات MBC صرحت إن رامز ينتمي لنقابة الفنانين والقرار لا ينطبق عليه. وإن عرض البرنامج مستمر في مواعيده على القناة.
