النهارده، 15 ديسمبر، اليوم العالمي للشاي. وبعيدًا عن تخصيص يوم للاحتفال بيه، فهو المشروب الرسمي المصري، اللي بيزق معانا اليوم. هو صديق الأزمات المزاجية المفاجئة، والسند الحقيقي في انتكاسات البال لو مش رايق. ومن حبنا فيه، بقى جزء من تراثنا الفني في أكتر من أغنية.
وبالمناسبة دي، تعالوا ناخد لفة كده على أشهر الأغاني اللي اتعملت مخصوص للشاي:
أشرب شاي - حماد هلال
.كسر الدنيا بالفيديو كليب، خصوصًا المشاهد البسيطة اللي بيعيشها ناس كتير كل يوم، وطبعاً كوباية الشاي بتاعت الصبح
شاي العروسة - حكيم
ده اللي مابيحبش شاي العروسة، حبه بعد أغنية حكيم. كلماتها بسيطة ولحنها يلزق في الدماغ. الأغنية والشاي يظبطوا المزاج.
إعلان شاي البراد الأزرق
حتة كده من أيام الزمن الجميل. وزي كلها حاجة وقتها، الشاي كمان كان جميل وبيظبط المود.
شاي العروسة - حسن الأسمر
بعد نجاح أغنية "أعملك إيه"، استخدم الفنان حسن الأسمر لحنها في إعلان شاي العروسة.
ما شربش الشاي - مروي
في الأصل غنتها الفنانة ليلى نظمي، لكن مروي غنتها بطريقتها وصورتها فيديو كليب. وخلت الأغنية مليانة ضحك وفرفشة.
قولوا لنا بقى شايكم إيه؟
