النهاردة 1 أكتوبر هو اليوم العالمي للقهوة. وبيمثل مناسبة للاحتفال بالقهوة في كل أنحاء العالم. أول تاريخ رسمي لليوم ده هو 1 أكتوبر 2015، بعد موافقة المنظمة الدولية للقهوة. وتم استغلاله في التشجيه على زيادة تجارة القهوة.

القهوة من غيرها اليوم يبقى ماسخ وناقصة حاجة. فعلا صدق اللي قال "القهوة كالحب.. قليل منه لا يروي، وكثير منه لا يشبع". وبما إن القهوة مزاج، فكل واحد بيشربها بمزاجه. فنجان على صوت فيروز، مع رواية جديدة، أو حتى من غير أي حاجة أصلًا. هي كده كده حلوة.

وبالمناسبة دي تعالوا نتعرف على الدول اللي بنتج أجود أنواع القهوة في العالم:

1- البرازيل

من أول الدول اللي انتجت القهوة في العالم، ووصلت نسبة إنتاجها لـ 35% من إجمالي إنتاج العالم. طبعًا مش محتاجين نقول لكم على جمال القهوة البرازيلي، ولا ريحتها المميزة اللي بتجيبك من آخر الشارع.

2- كولومبيا

تعرف إن في ناس بتسافر كولومبيا مخصوص علشان بس تدوق قهوتها، وتتمشى في منطقة حزام القهوة هناك. ده لإنها بتقدم أجود أنواع القهوة الموجودة في العالم، وبتحتل المرتبة الثانية. ووصلت نسبة إنتاجها لـ 12 %.

3- فيتنام

طعم البن الفيتنامي مميز جدًا، وده له علاقة بارتفاع سعرها. هي كمان من الدول المصدرة للقهوة لكل بلاد العالم. سنة 2012 كان الطلب عليها خيالي، ووصلت قيمة إنتاجها لـ 1.4 مليار دولار.

4- إندونيسيا

حوالي 90% من أراضي إندونسيا مزروعة بن، ده معناه إنها من أوائل الدول اللي بتصدرها في العالم. دي كمان بتنتج حوالي 13 نوع قهوة، كل نوع طعمه غير الثاني.

5- الهند

مناخ وطبيعة البلاد الهندية ساعدتها كتير في زارعة بذور البن، علشان كده استغلت مساحات كبيرة من أراضيها لإنتاج القهوة. الهند كمان بتنافس على توزيع القهوة في العالم، ووصل نسبة انتاجها لـ 3% من إنتاج البن العالمي.

6- المكسيك

المكسيك مشهورة بطعم قهوتها المدخن والمختلف. وده بيرجع لاختيارأفضل الأماكن لزاعة حبوب البن، اللي بيفرق كتير في طعمها وجودتها.

7- إثيوبيا

تحتل إثيوبيا المركز الخامس ضمن الدول المنتجة للقهوة، والمركز الرابع للدول المصدرة لها. تعتبر القهوة الإثيوبية من أجود أنواع القهوة، علشان تتميز بنكهة حولة جدًا. خليتها تتفوق على باقي أنواع القهوة.