النهارده 26 يوليو 2021، بيمر 5 سنين على رحيل المخرج الكبير محمد خان، اللي حبينا أفلامه، وشوفنا حياتنا فيها من غير أفورة أو خيال مبالغ فيه، وده اللي خلاه واحد من أهم مخرجين السينما الواقعية في مصر. أفلام "خان" -زي ما كان بيطلق عليه في الوسط- ماكنتش عادية، كمان حياته مليانة حكايات ناس كتير ماتعرفهاش، تعالوا نعرفها مع بعض:

1- والدته مصرية ووالده باكستاني، وعاش حياته كلها بيحاول يحصل على الجنسية المصرية، وكان عايش بجنسية والده الباكستانية، وفي سنة 2014 حصل على الجنسية المصرية واللي سماها بـ "الأمنية الغالية".

2- اتربي من صغره جنب دار سينما مكشوفة، وده كان بيخليه يتفرج على الأفلام من بلكونته طول الوقت، من هنا اتولد عشقه للسينما.

3- سافر لندن علشان يدرس هندسة، وبالصدفة اتعرف هناك على شاب كندي، كان السبب في تغيير حياته، بعد ما أقنعه يدرس معاه في معهدد السينما بلندن، وده اللي فعلًا حصل.

4- قدم محمد خان أفلام كتير، كلها قريبة جدًا من الواقع ونجحت نجاح كبير، منها: (مستر كاراتيه، موعد على العشاء، زوجة رجل مهم، أيام السادات، بنات وسط البلد، فتاة المصنع، الحريف).

5- حصل على جوائز من مهرجانات عالمية زي: الجائزة التقديرية الذهبية عن الإخراج الأول من مهرجان الإسكندرية السينمائي الدولي، جائزة العمل الأول من جمعية الفيلم، جائزة الدولة التقديرية عن فيلم "ضربة شمس"، وكمان جائزة لجنة التحكيم في مهرجان القارات الثلاث (نانت) بفرنسا عن فيلم "طائر على الطريق".

هتفضل عايش في قلوبنا يا خان يا ابن مصر يا غالي!