النهارده، 16 أغسطس، بيحتفل النجم تامر حسني بعيد ميلاده الـ 44، واللي قدر بموهبته اللي مايختلفش عليها اتنين، ينافس أكبر نجوم الغناء وكمان التمثيل. وبالمناسبة السعيدة دي، تعالوا نعرف إحنا ليه بنحب أفلام تامر حسني.
إفيهات كوميدية ماتتنسيش
مع إن تامر مطرب في الأساس، لكن خفة دمه دايمًا طاغية، حتى في أفلامه مهما كانت قصتها، لازم -يرمي- إفيه بلغة السينما، يوقعنا من الضحك، زي ما حصل في فيلم "سيد العاطفي"، لما كان حزين والصدفة جمعته بسواق تاكسي "البلاي ليست" عنده أغاني حزن بس، وقتها قال: "بقولك إيه ياريس ما تتقلب بينا وتخلص بقى".
أغاني بتروق علينا
سواء كانت مبهجة أو حزينة، ماتلاقيش فيلم لتامر حسني من غير أغنية مفرقعة كده، حتى من قبل نزول الفيلم في السينمات، الجمهور بيكون حافظها، ويفضل يرددها الموسم كله.
قصص حب شبهنا
قصص الحب في أفلام "تامر" بتشبه قصص عيشناها أو سمعنا عنها من صحابنا أو قرايبنا، علشان كده ناس كتير بتستنى أفلامه بنفس لهفتها لسماع أغانيه.
تتشاف مع الشلة
واحدة من أهم مميزات أفلام تامر حسني، إنها بتحترم فكرة الشلة، يعني هتنبسط جدًا لو روحت مع أصحابك السينما وشوفت واحد من أفلامه، أفلام شبابية، شبهنا، ورغم إن البعض بيشوف فيها إفيهات وتعبيرات غير لائقة، لكن في النهاية هي دي لغة الشباب والشارع الحقيقية.
كل سنة وأنت ممتعنا بفنك الجميل يا "تمورة"
