النهارده، بيحتفل الفنان الكوميدي هاني رمزي بعيد ميلاده الـ 57، واللي كانت أول خطواته الفنية على خشبة المسرح، لكنه تألق أكتر وظهرت ملامح موهبته على شاشة السينما، فيلم ورا فيلم حفظنا إفيهاته، وبقينا نضحك عليها في كل مرة وكأننا بسمعها لأول مرة.

وبالمناسبة دي، يالا نفتكر أكتر 4 أفلام ضحكتنا لهاني رمزي:

"جواز بقرار جمهوري"

أول بطولة مطلقة لهاني رمزي، سنة 2001 مع المخرج خالد يوسف، جسد خلاله دور موظف بسيط، بيبعت دعوة زفافه لرئيس الجمهورية، وبالفعل بيوافق وبيحضر فرحه، وبين كل ده بنشوف عرض مستمر لكوميديا محدش بينافسه فيها.

"محامي خلع"

"فيه فرق في السرعات سيدي القاضي"، إيفيه قلب الدنيا ولسه لحد النهارده بيضحكنا كل ما نفتكره، تلقائية هاني في مرافعة قانونية ساخرة، كانت كلمة السر في إضحاكنا مع إنها كانت جريئة شويتين.

" السيد أبو العربي وصل"

مع إنه إسكندراني، بس عرف إزاي يخلينا نصدق إنه بورسعيدي أصيل، لهجته ولبسه كانوا حقيقين بشكل يخليك استحالة تفرق بينه وبين أي واحد من بورسعيد عادي، واللطيف بقا إنه بعد السنين دي كلها، رجع بشخصية "أبو العربي" من خلال مسرحية كوميدية اسمها " أبو العربي في مهمة مستحيلة".

"غبي منه فيه"

من أنجح الأفلام اللي قدمها، الفيلم ده من لذاذته كتير مننا حافظين إيفيهاته بالحرف، وبرضه لسه بنقولها في مواقف كوميدية كتير بنقابلها، وبناء على طلب الجمهور فكر هاني في تقديم جزء تاني من الفيلم، لكنه تراجع وقال: "صعب عليا بعد وفاة حسن حسني وطلعت زكريا".

كل سنة وانت طيب يا صانع ضحكتنا

"أبو العربي في مهمة مستحيلة".. ميعاد ومكان عرض أحدث مسرحيات هاني رمزي