السؤال مش عيب، طبيعي جدًا إن اللي مش عارف حاجة بيسأل عنها. لكن أحيانًا بنسمع أسئلة غريبة، في مواقف معينة. بتكون غير منطقية. والأغرب إن في منها من كتر ما اتعودنا عليه، بقينا بنجاوبه عادي. رغم إننا لو ركزنا ثانيتين، هنلاقي الموضوع غريب أوي.
دي أكتر أسئله غريبة ومش منطقية، بنسمعها في حياتنا اليومية:
1- انت جيت؟
تبقى لسه داخل البيت مثلًا، وتلاقي والدك بيسألك: انت جيت؟ أو تبقى لسه داخل على زمايلك في الشغل، ويسألوك: انت وصلت؟ ساعتها لازم تتأكد إنك وصلت فعلًا، ولو ماحصلش اطلب من أي حد يرن عليك علشان يطمن. أو خلي حد ينزل يدور عليك في أي حتة.
2- قالك فين؟
السؤال الأشهر لما تسأل على عنوان انت رايحه. طب ماهو لو قالي يا فندم ماكنتش سألتك. ويا ريت الواحد بيستنى ردك علشان يساعدك، لأ ده بيهرش في دنه وبعدها يبدأ يهبد. أول ماتلاقيه هرش في دنه سيبه على طول. ويُستحسن من أول ما يسألك السؤال العبقري ده.
3- انت نمت ولا لسه صاحي؟
أه يا ماما أنا نايم وراكب المترو في الحلم دلوقتي، أول ما أنزل هكلمك علشان الصوت هنا بيقطع. هو الكوكب ده عايز مننا إيه؟
4- بقيت أحسن دلوقتي؟
طب أنا أه تعبت وأه أخدت الدوا. بس أحسن منين حضرتك؟ دي الحباية لسه في البلعوم. لسه في طريقها للمعدة، علشان لما تنزل تشوف هتعمل إيه.
الكارثة بقى في اللي بيرد ويقول: أه أحسن. ده انت لو في مدرسة السحر مع هاري بوتر مش هتخف بالسرعة دي يا جدع.
5- عامل إيه؟ إيه الأخبار؟ الدنيا حلوة؟ إلخ
طقم الأسئلة اللي كله بيتجاوب عليه بـ "الحمد لله". كأنه تحقيق شرطة علشان يتم التأكد إنك كويس، مش مجرد سؤال عن حالك. يا جماعة بلاش نستهلك بعض إحنا ماشيين بعلاج أصلًا.
6- أسئلة دكتور الأسنان
لحد دلوقتي مش مفهوم ليه دكتور الأسنان بيبدأ الدردشة معانا، وإحنا بقنا مفتوح على آخره؟ ويا ريته بيسأل أسئلة، إجابتها أه أو لأ. ده بيفتح مواضيع عايزة ردود مطولة. وانت أصلًا وسط كل ده مرعوب من شكل الحقنة وعايز حد ييجي يلحقك.
ونرجع ونقول إننا بنتعامل مع الأسئلة دي عادي، إحنا بس بنرصد ظاهرة مجتمعية خارقة للمنطق. يمكن في يوم نلاقي تفسير.
